जळगाव, शहाबाज देशपांडे -: जळगाव जिल्ह्याच्या औद्योगिक विकासाला नवी गती देण्यासाठी मंत्रालयात उद्योगमंत्री डॉ. उदय सामंत यांच्या अध्यक्षतेखाली महत्त्वपूर्ण आढावा बैठक पार पडली. बैठकीला वस्त्रोद्योग पालक मंत्री गुलाबराव पाटील, मंत्री संजय सावकारे आमदार राजूमामा भोळे, किशोरआप्पा पाटील, चंद्रकांत पाटील, अमोल चव्हाण, अमोल महाडिक, उद्योग विभागाचे प्रधान सचिव डॉ. पी. अन्बळगन, जळगावचे जिल्हाधिकारी रोहन घुगे, तसेच महाराष्ट्र औद्योगिक विकास महामंडळ (एमआयडीसी) आणि जिल्हा प्रशासनाचे वरिष्ठ अधिकारी उपस्थित होते.
बैठकीत जळगाव जिल्ह्यातील उद्योगांना अधिक सवलती आणि प्रोत्साहन मिळावे यासाठी ‘डी प्लस’ औद्योगिक धोरणाचा प्रस्ताव तातडीने सादर करण्याच्या सूचना उद्योगमंत्री डॉ. उदय सामंत यांनी अधिकाऱ्यांना दिल्या.
याशिवाय चिंचोली आणि कुसुंबा एमआयडीसीच्या विस्तारासाठी भूसंपादन प्रक्रिया गतीने पूर्ण करण्याचे निर्देश देण्यात आले. शेतकऱ्यांचे हित अबाधित ठेवत आणि उद्योजकांनाही परवडेल अशा समन्वयातून भूसंपादनाचे प्रश्न तातडीने निकाली काढण्यावर भर देण्यात आला.
बैठकीत अनेक वर्षे भूखंड ताब्यात घेऊनही उद्योग सुरू न करणाऱ्यांवर नियमानुसार कारवाई करून ते भूखंड नव्या व गरजू उद्योजकांना उपलब्ध करून देण्याचे निर्देशही देण्यात आले. तसेच एमआयडीसी परिसरातील रस्ते, पथदिवे आणि पाणीपुरवठ्याची कामे दर्जेदार व वेळेत पूर्ण करण्याच्या सूचनाही अधिकाऱ्यांना देण्यात आल्या.
दरम्यान, पाचोरा, मुक्ताईनगर, चोपडा आणि भुसावळ येथील प्रलंबित औद्योगिक कामांची संयुक्त पाहणी करून एका आठवड्यात सविस्तर अहवाल सादर करण्याचे आदेश संबंधित अधिकाऱ्यांना देण्यात आले.
