बदलापूर (वृत्तसंस्था) काही दिवसांपूर्वी बदलापूर-मुरबाड रस्त्यावर मृतावस्थेत आढळलेल्या योगेश केणे या ३८ वर्षीय व्यक्तीचा खून झाल्याचे स्पष्ट झाले आहे. दारू पिऊन शिवीगाळ करत पेंढ्याला आग लावण्याची धमकी दिल्याने संतापलेल्या सासऱ्याने केलेल्या मारहाणीत त्याचा मृत्यू झाल्याचे पोलीस तपासात निष्पन्न झाले आहे.
बदलापूर-मुरबाड रस्त्यावरील मोऱ्याचा पाडा या गावात बारवी नदीवरील पुलाखाली, १ मार्च रोजी दगडावर योगेश केणे (३८) याचा मृतदेह आढळून आला होता. कुळगाव पोलीस ठाण्यात याप्रकरणी सुरुवातीला आकस्मिक मृत्यूची नोंद करण्यात आली होती. तसेच ठाणे ग्रामीणचे पोलीस अधीक्षक डॉ. डी. एस. स्वामी, अपर पोलीस अधीक्षक डॉ. दीपाली घाटे, मुरबाड उपविभागीय पोलीस अधिकारी जगदीश शिंदे आदींच्या मार्गदर्शनाखाली कुळगाव पोलीस ठाण्याचे प्रभारी सपोनि गोविंद पाटील, पोह. डी. पी. केंगार, पवार, खडताळे, पोशि. राहुल दाभाडे यांच्या तपास पथकाची उभारणी करून पुढील तपास सुरू करण्यात आला होता.
या तपासात योगेश केणे (३८) याचा हा मृतदेह असल्याचे स्पष्ट झाले. त्याचबरोबर सासऱ्याने केलेल्या मारहाणीत त्याचा मृत्यू झाल्याचेही पुढे आले. योगेश केणे हा २९ फेब्रुवारीला दारू पिऊन घरी आला आणि सासरा संतोष नाईक यास शिवीगाळ करून तुमच्या पेंढ्याला आग लावतो, असे सांगून घराच्या आजूबाजूला फिरत होता. याचा सासरा संतोष याला राग आल्याने तो योगेशला मारण्यासाठी त्याच्या अंगावर धावला. मात्र योगेश पळून गेला. त्यानंतर रात्री योगेश हा दारू पिऊन घरी येत असताना संतोषने पाहिले आणि घरी येताच त्यास पकडून ठोश्याबुक्क्याने मारहाण केली.
या मारहाणीत योगेश बेशुद्ध अवस्थेत खाली पडला, तेव्हा संतोषने त्याला घरातील जनावराच्या खाद्याच्या काळ्या रंगाच्या प्लास्टिक पिशवीमध्ये भरून त्या पिशवीचे तोंड बांधले आणि ही पिशवी मोटारसायकलवर दोरीने बांधून सुमारे ७ ते ८ किलो मीटर अंतरावर बदलापूर ते मुरबाड जाणाऱ्या रोडवर मोऱ्याचापाडा गावाच्या हद्दीतील ब्रिजवरून बारवी नदीच्या पात्रात असलेल्या दगडावर फेकून दिली. यामध्ये योगेशच्या डोक्याला, कानाला व इतर ठिकाणी गंभीर मार लागून जखमी झाल्याने त्याचा मृत्यू झाल्याचे निष्पन्न झाले. त्यानुसार पोलिसांनी संतोष नाईक याच्याविरोधात हत्येचा गुन्हा दाखल करून त्याला अटक केल्याची माहिती पोलिसांनी दिली.
