पाळधी ता. धरणगाव (प्रतिनिधी) तालुक्यातील बांभोरी येथील हिताची अस्टेमो ब्रेक सिस्टीम कंपनीमध्ये वेतनवाढीसह कामावरून काढून टाकलेल्या कामगारांना परत घ्यावे, या मागणीसाठी कामगारांनी बेमुदत संप पुकारला आहे. आंदोलनस्थळी आज राष्ट्रवादीचे प्रदेश प्रवक्ते योगेश देसले यांनी भेट देत आंदोलनाला पाठींबा दिला. तसेच राज्याचे विरोधी पक्षनेते अजितदादा पवार यांच्याशीही फोनवर चर्चा करून सर्व हकीगत सांगितली.
बांभोरी येथील हिताची अस्टेमो ब्रेक सिस्टम इंडिया प्रा.लि. या कंपनीतील कामगार काही दिवसांपासून बेमुदत संपावर गेलेले आहेत. याठिकाणी आज राष्ट्रवादीचे प्रदेश प्रवक्ते योगेश देसले यांनी भेट देत कर्मचाऱ्यांचा भावना समजून घेतल्या. तसेच कंपनीचे एम डी. श्री. खांडेकर यांच्याशी फोनवर संवाद साधून यावर कंपनी प्रशासनाने लवकरात लवकर तोडगा काढून कामगारांना न्याय द्यावा, अशा सूचना दिल्या. तसेच राज्याचे विरोधी पक्षनेते अजितदादा पवार यांच्याशीही फोनवर चर्चा करून यामध्ये कामगारांच्या बाजूने आपण मुख्यमंत्री व कामगार मंत्री यांच्याशी चर्चा करावी, अशी विनंती केली. त्यावर अजित पवार यांनी कामगारांचे दोन प्रतिनिधी घेऊन मुंबईत यावे. आपण मुख्यमंत्री व कामगार मंत्री यांची भेट घेऊन, त्यावर तोडगा काढू असे आश्वासन दिले.
