साकळी ता.यावल (किरण माळी) तालुक्यातील गावा-गावात सर्रासपणे विमल गुटक्याची विक्री होत आहे. यासंदर्भात अन्न औषध प्रशासनासह पोलिस प्रशासनास तक्रार करुन ही लक्ष देत नसल्यामुळे तरुण पिढीसह शाळकरी मुले व्यसनांच्या आहारी जात आहेत.
कोरोना विघ्नाने सर्वच क्षेत्रातील व्यावसायिकांना ‘बुरे दिन’चा सामना करण्याची वेळ आलेली असली तरी गुटखा आणि तंबाखूजन्य पदार्थांचा व्यवसाय करणाऱ्या व्यावसायिकांना मात्र कधी नव्हे असे ‘अच्छे दिन’ बघायला मिळत आहेत. चोरट्या मार्गाने गुटखा आणि तंबाखूजन्य पदार्थांची वाहतूक व विक्री धडाक्यात सुरू असून, या गोरखधंद्यास आळा घालण्यास पोलिस व औषध प्रशासन कमी पडले आहे. गुटखा माफियांसोबतच या दोन्ही विभागातील अधिकारी व कर्मचाऱ्यांची कमाई होत असल्याची चर्चा आहे. गुटखा आणि तंबाखूजन्य पदार्थांची विक्री करणाऱ्या व्यावसायिकांची मात्र आर्थिक भरभराट झाली. जीवनावश्यक वस्तूंची वाहतूक करणाऱ्या वाहनांतून रात्रीत गुटख्यासह तंबाखूजन्य पदार्थ विशिष्ट स्थळी पोहचवले जात होते. या व्यवसायातील माफियांनी खोऱ्याने कमाई केली आहे. काही व्यापारी तर गुटख्याची ग्राहकांना घरपोच सेवा देत आहेत.
सहज उपलब्ध होतो गुटखा :-
गेल्या अनेक दिवसांपासून यावल तालुक्यातील फैजपूरसह सर्व गावात न्यायालयाने बंदी घातलेल्या मानवी जीवनाला घातक असणारा विमल गुटख्याची सर्वत्र खुलेआम विक्री करण्यात येत आहे. गावागावातील पानटपऱ्या, किराणा दुकान व इतर सार्वजनिक ठिकाणी अगदी सहज मिळणाऱ्या गुटख्यामुळे अगदी अल्पवयीन शाळकरी मुले ही घातक अशा गुटख्याच्या आकर्षणाच्या आहारी जावून गुटखा खात असल्याचे अत्यंत धक्कादायक चित्र पहावयास मिळत आहे .
परप्रांतातून सहज उपलब्ध होतो गुटखा :-
यावल तालुक्यात शेजारच्या गुजरात व मध्यप्रदेश या परप्रांतातून एस.टी.बस तसेच इतर वाहनांनी मोठ्या व प्रमाणावर चोरट्या मार्गाने गुटख्याची तस्करी सुरू आहे. दरम्यान इतक्या मोठ्या प्रमाणावर विमल गुटख्याची सर्रासपणे विक्री होत असतांना अन्न व औषध प्रशासन व पोलिस विभागाला याची माहिती नसावी का ? असा प्रश्नही या निमित्ताने उपस्थित होत आहे.
