छत्रपती संभाजीनगर (वृत्तसंस्था) शहरातील एका शाळेत ज्युनिअर केजीमध्ये शिकणाऱ्या साडेतीन वर्षांच्या मुलीवर एकाने लैंगिक अत्याचार केला, तर शिक्षिकेने त्याला मदत केल्याची तक्रार दाखल करण्यात आली आहे. यावरून पुंडलिकनगर पोलीस ठाण्यात अत्याचार, पोक्सो अंतर्गत गुन्हा दाखल करण्यात आला आहे. या प्रकरणी पोलिसांनी ३० वर्षीय शिक्षिकेला अटक केली, तर अमोल नावाच्या आरोपीचा पोलीस शोध घेत आहेत.
मुलीच्या आईने दिलेल्या फिर्यादीनुसार, शहरातील एका शाळेत ज्युनिअर केजीमध्ये ३ वर्षे ८ महिने वयाची तिची मुलगी जून २०२३ पासून शिकते. ती दररोज सकाळी दहा ते दुपारी दीड या वेळेत शाळेत असते. तिची आई तिला सोडायला आणि घ्यायला जात असे. मागील २० दिवसांपासून तिला त्रास होत असल्याने आईने तिला गारखेडा भागातील एका रुग्णालयात दाखविले. तेव्हा तिच्या गुप्तांगाजवळ जखम असल्याचे निदर्शनास आले. औषधउपचार करून आईने तिला घरी आणले. तिची विचारपूर केल्यावर तिने सांगितले की, अमोल नावाचा इसम इसम तिच्या गुप्तांगामध्ये पेन्सिल फिरवतो, तर वर्गशिक्षिका तिला मारहाण करते आणि तिला अमोलसोबत एका रूममध्ये लॉक करून ठेवते. अमोल तिच्यावर रूममध्ये ओरडतो. तसेच गालाला, ओठाला, पोटाला चावा घेतो व डोक्याला मारतो. ती ओरडली तर तिला तुला पंख्याला लटकवेल, गॅलरीतून फेकून देईल, अशी धमकी देतो. मुलगी दरवाजा उघडा म्हणून ओरडली तरी वर्गशिक्षिका दरवाजा उघडत नाही, अशी तक्रार पिडीत चिमुकलीच्या आईने दिली आहे. त्यावरून ३० वर्षीय शिक्षिका आणि अमोल नावाच्या इसमाविरुद्ध पुंडलिकनगर पोलीस ठाण्यात लैंगिक अत्याचाराच्या कलमासह पॉक्सोअंतर्गत गुन्हा दाखल करण्यात आला आहे.
या प्रकरणाचा पुढील तपास उपनिरीक्षक मेघा माळी या करीत आहेत. दरम्यान, तक्रार दाखल होताच पोलिसांनी तात्काळ संबंधित शाळेतील सीसीटीव्ही कॅमेऱ्याचा व्हीआर जप्त केला आहे. दरम्यान, संशयित आरोपी शिक्षिकेची पोलिसांनी चौकशी केली तेव्हा मी मुलांना कधीही मारहाण करत नाही. असा कुठलाही प्रकार घडलेला नसल्याचे सांगितले. तसेच शाळेत एकही पुरुष नाहीत आणि अमोल नावाचा केवळ छोटा ३ वर्षांचा एक मुलगा आहे. तर उर्वरित सर्व महिला शिक्षिका असल्याचेही सांगीतले. त्यामुळे अमोल नावाचा व्यक्ती कोण, याचा पोलिसांना शोध घ्यावा लागणार आहे.
