धरणगाव (प्रतिनिधी) येथील माजी नगराध्यक्ष पी.एम.पाटील यांनी महाराष्ट्र ग्रंथालय सेनेच्या राज्य उपप्रमुख पदाचा राजीनामा दिला आहे. प्रदेश प्रमुख शिल्पाताई सरपोतदार, सचिव संजय मोठे यांच्याकडे लेखी पत्राद्वारे त्यांनी राजीनामा दिलाय. दरम्यान, पी.एम.पाटील यांनी महाविकास आघाडीला घराचा आहेर देत नाराजी व्यक्त केली आहे.
महाराष्ट्रातील शासन मान्यताप्राप्त अनुदानित ग्रंथालयांचा अनेक वर्षापासून ज्या प्रमुख मागण्या आहेत. त्या मागण्या पूर्ण होत नसल्यामुळे राजीनामा दिला असल्याचं पी.एम.पाटील यांनी स्पष्ट केले आहे. बारा वर्षापासून महाराष्ट्रातील नवीन ग्रंथालयाचे प्रस्ताव शासनाकडे प्राप्त असून एकाही ग्रंथालयाला परवानगी मिळाली नाही. एकाही ग्रंथालयाचा दर्जा बदल झालेला नाही. अनुदानात सुद्धा वाढ झालेली नाही. अतिशय अल्प अनुदानात ग्रंथालय सुरू असून अतिशय बिकट परिस्थिती आहे. प्रश्न सुटत नसेल तर पदाचा काय उपयोग? त्यापेक्षा बाजूला झालेले बरे, असेही श्री. पाटील यांचे म्हटले आहे.
महाराष्ट्रात मुख्यमंत्र्यांसह उच्च व तंत्र शिक्षण मंत्री हे सेनेचे आहेत. त्यामुळे आपले प्रश्न सहज मार्गी लागतील असे वाटले होते. परंतु राज्याचे उपमुख्यमंत्री अजितदादा पवार यांना मुळीच वाटत नाही. राज्यातील ग्रंथालयांचे प्रश्न मार्गी लागावे असे वाटते. अगदी इतर मंत्र्यांनाही वाटते की, ग्रंथालयाचे प्रश्न सुटायला पाहिजेत. परंतु, अजितदादा च्या पुढे कोणीही जाऊ शकत नाही, असे अनुभव ग्रंथालयातील पदाधिकाऱ्यांना आले आहेत. त्यामुळे आपण महाराष्ट्र ग्रंथालय उपप्रमुख पदाचा राजीनामा देत असून राज्याचे राज्यपाल भगतसिंग कोश्यारी यांना समक्ष भेटून महाराष्ट्रातील ग्रंथालयाची व्यथा मांडणार असल्याचेही श्री. पाटील यांनी सांगितले आहे. महाराष्ट्रातील अनेक पदाधिकारी राजीनामा देण्याच्या तयारीत असल्याचंही पी.एम पाटील यांनी सांगीतले. तर ग्रंथालयचे प्रश्न सुटण्यासाठी पी एम पाटील सर व काही पदाधिकारी राज्यपाल भगतसिंग कोश्यारी यांना भेटून प्रश्न मार्गी लावण्याचा प्रयत्न करणार आहेत.
