जळगाव (प्रतिनिधी) धरणगाव येथे शेतात नेतांना काही शेत मजूर महिलांचा अपघात झाला होता. घटनेची माहिती मिळताच माजी जि.प. सदस्य प्रतापराव पाटील यांनी जिल्हा रुग्णालयात धाव घेत डॉक्टरांना तात्काळ उपचारासंबंधी सूचना दिल्यात.
धरणगावातील कृषी उत्पन्न बाजार समितीजवळ शेतमजूर महिलांना शेतात नेणाऱ्या वाहनाला अपघात झाल्याची घटना आज सकाळी घडली होती. या अपघातात १ महिला जागीच ठार तर ७ महिला आणि चालक जखमी झाल्या होत्या. जखमींना जळगाव वैद्यकीय महाविद्यालयात दाखल करण्यात आले होते. घटनेची माहिती मिळताच माजी जि.प. सदस्य प्रतापराव पाटील यांनी रुग्णालयात धाव घेतली. तसेच जखमींची विचारपूस करत त्यांना धीर दिला. यावेळी डीन डॉ. गिरीश ठाकूर हे उपस्थित होते. सदस्य प्रतापराव पाटील यांनी डॉक्टरांना जखमींवर तात्काळ उपचार करण्याच्या सूचना दिल्यात.
शेतात जातांना झाला होता अपघात !
आज सकाळी साडेआठ वाजेच्या सुमारास झायलो कारमधून काही मजूर महिलांना शेतात नेण्यात येत होते. कृषी उत्पन्न बाजार समितीच्या पुढे एका ठिकाणी कार अचानक पलटी झाली. या अपघातात कारमधील बसलेले सर्व जण कमी अधिक प्रमाणात जखमी झाले आहेत. दरम्यान, धरणगाव वैद्यकीय रुग्णालयातून मिळालेल्या माहितीनुसार चंद्रकलाबाई महाजन यांचा मृत्यू झाला आहे. तर निनाबाई महाजन, सुमन महाजन, माधुरी महाजन, जिजाबाई महाजन, स्वाती महाजन, ढगूबाई महाजन, महेंद्र पाटील हे जखमी आहेत. सर्व जखमींना जळगाव येथे पुढील उपचारासाठी रवाना करण्यात आले आहे.
