नागपूर (वृत्तसंस्था) किन्हाळा गावाकडे कामानिमित्त स्कूटीने डबलसीट जाणाऱ्या दोघा मित्रांना नागपूरवरून भिवापूरकडे येणाऱ्या चारचाकी वाहनाने जोराची धडक दिली. या अपघातात स्कूटीस्वार जागीच ठार तर मागे बसलेला त्याचा मित्र ग्रामीण रुग्णालयात नेताना दगावला. ही दुर्दैवी घटना २२ डिसेंबर रोजी सकाळी १०.३० वाजता आयटीआयसमोर तास शिवारात घडली.
विजय हेडावू (३८) व अजय रामटेके (२६, दोघेही रा. भिवापूर), अशी मृतकांची नावे आहेत. विजय हेडावू व अजय रामटेक हे दोघे स्कूटीने किन्हाळा (जवराबोडी) येथे जात होते. यादरम्यान, तास कॉलनी, शासकीय औद्योगिक प्रशिक्षण (आयटीआय) समोर नागपूरवरून भिवापूरकडे येणाऱ्या वाहन क्रमांक एमएच ३३/ टी ०५९०ने त्यांच्या स्कूटीला जोराची धडक दिली. यात स्कूटीचालक विजय हेडावू जागीच ठार तर दुचाकीच्या मागे बसलेला त्याचा मित्र अजय रामटेके गंभीर जखमी झाला. ग्रामीण रुग्णालयात नेताना अजयचा मृत्यू झाला. त्यामुळे वाहनचालक आरोपी राजू दशरथ ठाकरे (रा. नागभीड, जि. चंद्रपूर) हा वाहनासह पसार झाला. पोलिसांनी ब्रह्मपुरी, जि. चंद्रपूर येथून वाहन ताब्यात घेतले. विजय व अजय यांच्या पार्थिवावर शुक्रवारी सायंकाळी मरू नदीवर अंत्यसंस्कार करण्यात आले. पोहवा आनंद धात्रक यांनी घटनेचा प्राथमिक तपास केला असून पुढील तपास पीएसआय संदीप सडमेक करीत आहेत.
