गोंदिया (वृत्तसंस्था) बीएस्सीचा पेपर देण्यासाठी परीक्षा केंद्रावर मोटारसायकलने जात असलेल्या विद्यार्थ्याच्या मोटारसायकलने एसटीला मागून धडक दिल्याने जागीच मृत्यू झाल्याची दुर्दैवी घटना बुधवारी दि. २६ जुलै रोजी दुपारी १ वाजताच्या सुमारास साखरीटोला तेलीटोला मार्गावर घडली. महक राजेंद्र भांडारकर (२१, रा. इसनाटोला, ता. सालेकसा ) असे अपघातात ठार झालेल्या विद्यार्थ्याचे नाव आहे.
महक भांडारकर व त्याचा मित्र बबलू मुनेश्वर हे दोघेही बुधवारी दुपारी मोटारसायकल (क्रमांक एम. एच. ३५ एएस ८६६२) ने लोहारा येथील महाविद्यालयात बीएस्सी प्रथम वर्ष द्वितीय सेमीस्टरचा पेपर देण्यासाठी साखरीटोला येथून निघाले होते. दरम्यान, गोंदिया-देवरी मार्गाने निळ्या रंगाची बस देवरीकडे जात होती. बस क्रमांक (एस. एम. एच ०७ सी – ९३६०) ने कारूटोला ओलांडल्यानंतर अचानक बसच्या समोर शेळी आल्याने चालकाने ब्रेक मारला. त्याच वेळी बसचा वेग कमी झाला. त्यामुळे महकचे मोटारसायकलवरील नियंत्रण सुटल्याने बसच्या मागील बाजूस जोरदार धडक दिली. ही धडक एवढी जोरदार होती की, महकच्या डोक्याला गंभीर दुखापत होऊन त्याचा घटनास्थळीच मृत्यू झाला. तर मागे बसलेला बबलू किरकोळ जखमी झाला.
दरम्यान, शेतात काम करीत असलेले कारूटोल्याचे सरपंच उमराव बोहरे व ग्रामस्थांनी घटनास्थळी पोहोचून पोलिसांना माहिती दिली. तसेच बसधील विद्यार्थिनींना परीक्षा केंद्रावर पोहोचण्यासाठी मदत केली. महक भांडारकर हा राजेंद्र भांडारकर यांचा एकुलता मुलगा होता. त्याची आई सत्यभामा भांडारकर आशावर्कर सुपरवायझर आहे. बुधवारी दुपारी महक पेपर देण्यासाठी मोटारसायकलने घरून निघाला. मात्र त्याचा अपघाती मृत्यू झाल्याने महकच्या कुटुंबावर मोठा आघात झाला आहे. एकुलत्या एक मुलाचा मृतदेह बघताच महकच्या आईने काळीज चिरणारा आक्रोश केला होता.
