पुणे (वृत्तसंस्था) पुण्यात भरदिवसा दोन टोळ्यांमध्ये गोळीबाराची धक्कादायक घटना घडली आहे. या गोळीबारात तीन जण गंभीर जखमी झाले आहेत. पुणे इथल्या उरळीकांचन आणि लोणीकाळभोर दरम्यान तळवडे फाट्याजवळील चौकात गोळीबाराची घटना घडली.
अवैध धंद्यांवरुन दोन टोळ्यांमध्ये वाद होता. या वादातून दिवसाढवळ्या भररस्त्यात गोळीबार करण्यात आला. या गोळीबारात तीन जण जखमी झाले असून दोन जणांची प्रकृती गंभीर आहे. दोन टोळ्यातील जुन्या वादातून हा गोळीबार झाल्याची माहिती आहे. संतोष जगताप आणि इतर दोघे असे तीन जण गंभीर जखमी आहेत. जखमींवर विश्वराज हॉस्पिटलमध्ये उपचार सुरू आहे. पुणे ग्रामीण पोलीस याप्रकरणी अधिक तपास करत आहेत. दिवसाढवळ्या गोळीबाराची घटना घडल्याने परिसरात भीतीचं वातावरण पसरलं आहे.
