जळगाव (प्रतिनिधी) कौटूंबिक न्यायालयात मदतीसाठी गेलेल्या बापुराव पिरा मोरे (वय ४६) या जळगाव शहर पोलीस ठाण्याच्या कर्मचाऱ्याच्या कानशिलात लगावल्याचा खळबळजनक प्रकार उघडकीस आला आहे. याप्रकरणी आतिष दिनेश बारसे व अमित दिनेश बारसे (दोन्ही रा.इंद्रप्रस्थ नगर, जळगाव) या भावंडाविरुध्द मंगळवारी जिल्हा पेठ पोलिसात शासकीय कामात अडथळा निर्माण केल्याचा गुन्हा दाखल करण्यात आला आहे.
बापुराव मोरे जळगाव शहर पोलीस ठाण्यात कार्यरत असून सोमवारी त्यांना डायल ११२ या शासकीय पोलीस वाहनावर आरटीपीसी ड्युटीवर असताना सायंकाळी राजेश सुभाष पाटील (रा.कुरंगी, ता.पाचोरा) यांनी आम्हाला मारहाण होत असल्याचे सांगत मदत मागितली. त्या कॉलनुसार मोरे व हवालदार अय्युब पठाण बी.जे.मार्केटमधील कौटूंबिक न्यायालयात गेले. तेथे मोरे यांनी कोणी कॉल केला व काय मदत हवी?, अशी विचारणा केली. त्यावेळी तिथ राजेश पाटील त्यांची भाची गायत्री मच्छींद्र पाटील, रवींद्र भिका पाटील, बहिण दीपाली मच्छींद्र पाटील (सर्व रा.विखरण, ता.एरंडोल) असे होते. गायत्री हिचा न्यायालयात पती आतिष बारसे याच्यासोबत घटस्फोट झालेला आहे. त्यामुळे चिडून आतिष हा बहिण दिपाली हिच्या अंगावर धावून आला तर चुलत मेहुणे रवींद्र पाटील यांना मारहाण केल्याचे राजेश पाटील यांनी पोलिसांना सांगितले. त्यावर मोरे यांनी तुम्हाला पोलिसात तक्रार द्यायची आहे का? नसेल तर खाली सोडतो असे सांगितले. मोरे यांनी तक्रार द्यायची तयारी दर्शविल्याने या सर्वांना पोलीस वाहनात बसविल्यावर आतिष याने उजव्या बाजुचा दरवाजा जोरात उघडून गायत्री पाटील हिला हात धरुन बाहेर ओढले. त्यावर मोरे यांनी सरकारी वाहनाचा दरवाजा का उघडला?, असा जाब विचारला. यानंतर आतिष याने मोरे यांच्या कानशिलात लगावली. त्याचा भाऊ अमित याने देखील या पोलिसांशी धक्काबुक्की केली. यावेळी शहर पोलीव ठाण्याचे उपनिरीक्षक दत्तात्रय पोटे यांना मदतीसाठी बोलावून घेण्यात आले. तेथून या दोघं भावंडांना शहर पोलीस ठाण्यात नेण्यात आले. पहाटेच्या सुमारास दोघं भावंडाविरुध्द गुन्हा दाखल करण्यात आला.
