धरणगाव (प्रतिनिधी) शहरातील एका भागात राहणाऱ्या एका १४ वर्षीय अल्पवयीन विद्यार्थिनीचा अपहरणाचा प्रयत्न फसल्याची धक्कादायक घटना आज सकाळी घडल्यामुळे एकच खळबळ उडाली होती. या प्रकरणी धरणगाव पोलिसात दोन अज्ञात लोकांविरुद्ध गुन्हा दाखल करण्यात आला आहे.
पोलीस सूत्रांनी दिलेल्या माहितीनुसार आज 19 मार्च रोजी पहाटे साडेसात वाजेच्या सुमारास शहरातील एक अल्पवयीन मुलगी ट्युशनसाठी गेलेली होती. परंतू १० वाजेपर्यंत मुलगी घरी न आल्यामुळे पालकांना काळजी वाटायला लागली. त्यांनी लागलीच बाहेरगावी राहणाऱ्या मुलीच्या काकांना घटनेची माहिती दिली. काकांनी तात्काळ धरणगाव गाठत मुलीच्या मैत्रिणीकडे विचारपूस केली. तिने सांगितले की, तुमच्या पुतणीची ट्युशनची बॅग गांधीमळा धरणगाव येथे पडली आहे. थोड्याच वेळात मुलीच्या काकांना कळाले की, त्यांची पुतणी रेल्वे स्टेशन जवळ रडत आहे. तेथे गेल्यावर काही महिला तिच्या आजूबाजूला उभ्या होत्या.
यानंतर मुलीची विचारपुस केली असता तिने सांगीतले की, मी क्लासवरुन घरी जात असतांना गांधीमळा येथे दोन इसम तोंडाला रुलाम बांधून विना नंबरच्या काळ्या रंगाच्या पल्सर मोटार सायकलवर आले व त्यांनी पत्ता विचारण्याच्या बहाण्याने पाठीमागून माझ्या तोंडाला रुमाल बांधुन स्कूल बॅग फेकुन हात पाठीमागे पकडुन बळजबरीने मोटार सायकलवर बसवून घेऊन जात असतांना माझे काका पोलीस आहेत?, असे सांगीतल्यामुळे त्यांनी मला जळगाव रोडला छत्रपती शिवाजी महाराज कमान जवळ गाडीच्या खाली उतरवुन जोराचा धक्का देत जळगावच्या दिशने निघून गेल्याची हकीगत सांगितली.
दरम्यान, या प्रकरणी दोन अज्ञात इसमांविरुद्ध गुन्हा दाखल करण्यात आला असून पुढील तपास सपोनि जिभाऊ पाटील हे करीत आहेत. दरम्यान, घटनेची माहिती मिळताच पोलीस निरीक्षक उद्धव ढमाले यांनी घटनेशी संबंधित सर्व ठिकाणचे सीसीटीव्ही फुटेज काढण्याचे काम सुरु केले आहे.
