छत्रपती संभाजीनगर (वृत्तसंस्था) वैजापूर पोलिस ठाण्यात कार्यरत असलेल्या एका पोलिस कर्मचाऱ्याने गाऱ्हाणे मांडण्यासाठी आलेल्या महिलेला रात्री उशिरा फोन करून अश्लिल संवाद साधत विनयभंग केल्याची खळबळजनक घटना २६ ऑक्टोबर रोजी रात्रीच्या सुमारास घडली. याप्रकरणी पोलिस कर्मचारी रावसाहेब श्रीपतराव रावते (३५, रा. जीवनगंगा कॉलनी, वैजापूर) याच्याविरुद्ध वैजापूर पोलिस ठाण्यात गुन्हा दाखल केला आहे.
२७ वर्षीय पिडीत महिला एका साडीच्या दुकानात काम करते. या महिलेचे पैसे दुकानदाराने अडवून ठेवले होते. त्याची तक्रार देण्यासाठी २० ऑक्टोबर रोजी सकाळी ठाण्यात गेलेल्या महिलेला हवालदार रावते भेटले. रावते यांनी विचारपूस करत ‘सबंधिताला ठाण्यात बोलावून घेतो, तो आला की तुम्ही या’ असे सांगितल्याने महिलेने आपला मोबाइल नंबर दिला. त्यानंतर सायंकाळी ४ वाजेला दुकानदार ठाण्यात आला असून त्याला जावून भेटा असे रावते यांनी आपल्या मोबाइलवरून पीडित महिलेला फोन करून सांगितले. पोलीस ठाण्यात दुकानदाराने दोन दिवसांत पैसे देण्याचे आश्वासन दिल्याने तक्रार अर्ज न देता महिला निघून गेली.
मात्र दुकानदाराने पैसे न दिल्याने गुरुवारी सकाळी रावते यांना महिलेने फोन केला होता. त्यावेळी रावते यांनी बोलाविल्याने महिला पतीसह बसस्थानकावर भेटल्यावर तुम्ही काळजी करू नका. दुकानदाराविरुद्ध अर्ज द्या मी त्याच्यावर कारवाई करतो असे रावते म्हणाले. त्यानंतर रावते यांनी पुन्हा पुन्हा फोन करून आपण शिर्डीला सोबत जावू असे म्हटले. तसेच अश्लील संवाद साधत पिडीत महिलेचा विनयभंग केला. महिलेने फोन कट केल्यावरही सायंकाळपर्यंत रावते तिला वारंवार फोन करत होते. या प्रकरणी २७ वर्षीय महिलेने दिलेल्या फिर्यादीवरून हवालदार रावसाहेब श्रीपती रावते याच्यावर वैजापूर पोलिसांनी विनयभंगाचा गुन्हा नोंदविला आहे. अधिक तपास पिंक पथकाच्या उपनिरीक्षक निशा बनसोडे ह्या करत आहे. याबाबतचे वृत्त आज स्थानिक माध्यमांनी दिले आहे.
