नवी दिल्ली (वृत्तसंस्था) तामिळनाडूतील तिरुवन्नामलाई जिल्ह्यात १६ वर्षीय शाळकरी मुलीवर बलात्कार करून गरोदर केल्याप्रकरणी पोलिसांनी एका तरुणासह शाळेचे मुख्याध्यापक आणि वसतिगृहाच्या वॉर्डनलाही अटक केली आहे. मुख्याध्यापक आणि वसतिगृहाच्या वॉर्डनला घटनेची माहिती मिळूनही दोघांनीही बाल संरक्षण विभागाला माहिती दिली नाही.
चेंगलपट्टू जिल्ह्यातील कोवलम येथे मुलगी सुट्टीच्या दिवशी तिच्या घरी पोहोचली तेव्हा ही बाब उघडकीस आली. येथे तिने आत्महत्येचा प्रयत्न केला. तात्काळ कुटुंबीयांनी तिला रुग्णालयात दाखल केले. त्यांच्या मुलीच्या पोटात ६ महिन्यांचा गर्भ असल्याचे डॉक्टरांनी कुटुंबीयांना सांगितले. कुटुंबीयांनी तत्काळ पोलिसांत गुन्हा दाखल केला. शाळेजवळ राहणारा हरिप्रसाद हा याला कारणीभूत असल्याचे मुलीने पोलिसांना सांगितले. पाच दिवसांच्या उपचारानंतर मंगळवारी मुलीचा मृत्यू झाला.
मात्र, मृत्यूपूर्वी तिचा जबाब नोंदवण्यात आला. मुलीच्या साक्षीनंतर पोलिसांनी हरिप्रसादला पॉक्सो कायद्यांतर्गत अटक केली. पोक्सो कायद्यांतर्गत गुन्हा दाखल करून पोलिसांनी शाळेच्या मुख्याध्यापक आणि वॉर्डनलाही अटक केली आहे.
