सांगली (प्रतिनिधी) बारावी चाचणी परीक्षेत कमी गुण मिळाल्यामुळे माध्यमिक शिक्षक असलेल्या पित्याने मुलीस लाकडी जात्याच्या खुंट्याने केलेल्या मारहाणीत तिचा मृत्यू झाल्याची धक्कादायक घटना शुक्रवारी (२० जून) रोजी घडली होती. याप्रकरणी रविवारी रात्री पोलिसांनी धोंडिराम भगवान भोसले याच्यावर खुनाचा गुन्हा दाखल करून त्याला अटक केली. त्यास न्यायालयात हजर करण्यात आले असता २४ जूनपर्यंत पोलीस कोठडीची शिक्षा सुनावली.
मृत साधना (वय १७) ही आटपाडीत बारावीला विज्ञान शाखेत शिकत होती. तिचे वडील नेलकरंजी गावात खासगी संस्थेत शिक्षक म्हणून कार्यरत आहेत. साधनाला बारावीत चाचणी परीक्षेत कमी गुण मिळाले होते. त्यामुळे वडील धोंडिराम संतापले. शुक्रवारी रात्री ९.३० च्या सुमारास साधनाला घरातच लाकडी खुंट्याने बेदम मारहाण करण्यास सुरुवात केली. यात ती गंभीर जखमी होवून तिचा मृत्यू झाला. दरम्यान, अंत्यविधीनंतर साधनाची आई प्रीती भोसले यांनी फिर्याद दिली. त्यानुसार आटपाडी पोलीस ठाण्यात धोंडिराम भोसले याच्याविरूध्द बीएनएस १०३ (१), तसेच ज्युवेनाइल जस्टिस अॅक्ट २०१५ चे कलम ७५ प्रमाणे गुन्हा दाखल करण्यात आला.
