धरणगाव (प्रतिनिधी) शहरालगत अमळनेर रस्त्यावर असलेल्या गायरान जमिनीवरील अतिक्रमण संदर्भात धरणगावात गायरान बचाव मंचतर्फे ८ डिसेंबरला मूक मोर्चाचे आयोजन करण्यात आले आहे. तसेच मोर्चानंतर २२ हजार नागरिकांच्या सह्यांचे निवेदन तहसीलदारांना देण्यात येणार आहे.
यासंदर्भात अधिक असे की, धरणगाव शहरातील अमळनेर रोड लगत असलेल्या गट नं. १२४८ व १२४८/१ १२४८/२ मधील गावरान जमीन ३ हेक्टर ५१ आर असून त्या जमिनीचा पूर्वापार पासून गायरान म्हणून वापर केला जात आहे. आणि संबंधित गट नंबर वरील सातबाऱ्यावर देखील गायरानसाठी आरक्षित म्हणून उल्लेख आहे. असे असताना देखील धरणगावातील काही समाजकंटकांनी मानवसेवा संकल्प प्रतिष्ठान, मुंबई या संस्थेला हाताशी धरून संगनमताने सदरील गायरान जागेवर बेकायदेशीर बांधकाम केलेले आहे. त्याच बरोबर पूर्ण गायरान जमिनीचा बेकायदेशीर कब्जा घेण्याच्या तयारीत आहेत तसे झाल्यास परिसरातील गायींना व पशुधनाला चरण्यासाठी कुठलीही जागा शिल्लक राहणार नाही, शहरालगत ही एकच जमीन गायरान म्हणून आहे.
या जमिनीवर जर अतिक्रमण करून कब्जा झाला तर गुरांनी चरण्यासाठी कुठं जावं? असा मोठा प्रश्न निर्माण होईल ही बाब लक्षात घेता त्याविरोधात शहरातील सामाजिक कार्यकर्ते शिरीष बयस यांनी अतिक्रमण विरोधात दि. २८-१२-२०१५ ला जिल्हाधिकारी, जळगाव यांच्याकडे तक्रार दिली होती. परंतु त्या तक्रार अर्जाची दखल तत्कालीन जिल्हाधिकारी यांनी घेतली नाही म्हणून दि. ०९-०९-२०२१ ला पुन्हा तक्रार करण्यात आली. व महाशय जिल्हाधिकारी यांनी धरणगाव तहसीलदार व न. पा मुख्याधिकारी यांना दि. १३-०९-२०२१ रोजी आदेश दिले की, बेकायदेशीर बांधकाम थांबवून अनधिकृत बांधकाम काढण्यात यावे. परंतु तहसीलदार व नगरपालिकेचे मुख्याधिकारी यांनी आजतागायत जिल्हाधिकारी यांच्या आदेशाची कार्यवाही केलेली नाही म्हणून दि २०-१०-२०२१ रोज तहसीलदार, धरणगाव यांना गायरान बचाव मंचाने निवेदन दिले होते.
त्यानंतर आतापर्यंत आदेशाच अंमलबजावणी झालेली नाही. गायरान बचावच्या समर्थनार्थ २२ हजार नागरीकांनी सह्या दिलेल्या आहेत. जिल्हाधिकारी यांच्या आदेशाची अंमलबजावणी होऊन अतिक्रमण काढण्यासाठी दि. १७-११-२०२ रोजी गायरान बचाव मंचाच्यावतीने मूक मोर्चाचे आयोजन केलेले होते परंतु महाराष्ट्रातील सामाजिक बातावरण त्याकाळात बिघडले असल्याने व प्रशासनला सहकार्य म्हणून त्यावेळी मोर्चा तूर्त स्थगित केला होता. परंतु जिल्हाधिकारी यांच्या आदेशाची अंमलबजावणी अजून पर्यंत केलेली दिसत नाही म्हणून दि. ०८/१२/२०२१ बुधवार रोजी सकाळी ९.०० वाजता पशुधन पालक, शेतकरी आदी शासकिय गायरान जमिनीच्या बचावासाठी शांततेचा मार्गाने मूक मोर्चाचे आयोजन केले आहे. तसेच मोर्चानंतर २२ हजार नागरीकांच्या सह्याचे निवेदन तहसीलदार यांना देण्यात येईल.
याप्रसंगी राष्ट्र कोषाध्यक्ष अखिल भारतीय संत समिती निर्मल आघाडयाचे महामंडलेश्वर स्वामी जनार्दनहर महाराज तसेच रामेश्वर येथील मंहत प.पु. स्वामी नारायनाचार्य व श्री श्री १००८ मंडलेश्ववर ह.भ.प. भगवानदासजी महाराज यांचे आशीर्वचन लाभणार आहे, असे पत्रकार परिषदेत सांगण्यात आले. यावेळी ऍड. राहुल पारेख, शिरीष बयस, अमोल महाजन,ऍड. महेंद्र चौधरी, ऍड. रामभाऊ शिंदे, दिलीप महाजन, कन्हैया रायपूरकर यांच्यासह आदी उपस्थित होते.
