मुंबई (वृत्तसंस्था) राज्यातील सन २०२३ मधील कापूस तसेच सोयाबीन उत्पादक शेतकऱ्यांना प्रति हेक्टरी ५ हजार रुपये अर्थसहाय्य दिले जाणार आहे. त्यासाठी पात्र शेतकऱ्यांनी त्यांच्या आधार आणि बँक खात्याशी संलग्न असलेल्या माहितीचा वापर व्हावा, यासाठी त्यांचे वैयक्तिक संमतीपत्र किंवा सामूहिक ना हरकत पत्र संबंधित कृषी सहाय्यकाकडे जमा करण्याचे आवाहन कृषिमंत्री धनंजय मुंडे यांनी शेतकऱ्यांना केले आहे.
सन २०२३ च्या खरीप हंगामामध्ये कापूस, सोयाबीनचे कमी दर मिळाल्याने शेतकऱ्यांना झालेल्या आर्थिक नुकसानीवर उपाययोजना म्हणून राज्य शासनाने मागील वर्षीच्या सोयाबीन व कापूस उत्पादक शेतकऱ्यांना प्रतिहेक्टरी ५ हजार रुपयांप्रमाणे, दोन हेक्टरपर्यंत मदत देण्याचा निर्णय घेतला आहे. ही रक्कम सोयाबीन-कापूस उत्पादक असलेल्या आणि ज्यांनी ई-पीक पेऱ्यांची नोंदणी केलेली आहे, अशा सर्व शेतकऱ्यांना दिली जाणार आहे. शेतकऱ्यांचे आधार व बँक खाते संलग्न असलेली माहिती, कृषी विभागाने शेतकऱ्यांच्या खात्यांवर रक्कम वर्ग करण्यासाठी वापरावी, यासाठी शेतकऱ्यांनी वैयक्तिक संमतीपत्र तातडीने सादर करावे, जेणेकरून लवकरात लवकर शेतकऱ्यांच्या खात्यावर निधी वितरीत करता येईल, असे मुंडे यांनी म्हटले आहे.
