धुळे (प्रतिनिधी) साक्री तालुक्यातील रोजगाव शिवारात असलेल्या शेतीची खातेफोड करून सातबारा उतारा देण्यासाठी दोघांच्या मार्फत २० हजारांची लाच मागितल्याप्रकरणी गुन्हा दाखल करण्यात आला आहे. तलाठी ज्योती पवार यांनी संगणक चालक योगेश साबळे व कोतवाल छोटू जाधव मार्फत ही मागणी झाली होती.
नंदुरबार जिल्ह्यात वनपाल असलेल्या व्यक्तीच्या तक्रारीनुसार रोजगाव शिवारात त्यांची शेती आहे. तिची तीन भागात खातेफोड करत सातबारा उतारासाठी त्यांनी तलाठी कार्यालयात अर्ज दिला होता. या कामासाठी तलाठी ज्योती के. पवार (वय ३४ रा. नांदरखेडा, ता. जि. नंदुरबार) यांनी २० हजारांची मागणी केली. तसेच तडजोडी अंती १५ हजार रुपये देण्याचे ठरले. याबाबत तक्रारदारांनी नंदुरबार लाचलुचपत प्रतिबंधक विभागात तक्रार दिली. या तक्रारीची पडताळणी झाली.
तक्रारदार पुन्हा कार्यालयात गेल्यावर संगणक चालक योगेश कैलास साबळे (वय २५, रा. उभरांडी, ता. साक्री) याने पैसे आणले का अशी विचारणा केली. त्यानंतर तलाठी ज्योती पवार यांनी तक्रारदारांना बोलावल्यावर तक्रारदार कार्यालयात आले. तेव्हा तलाठी पवार यांनी १५ हजारांची मागणी केली. पण पैसे स्वतः न स्वीकारता कोतवाल छोटू भिकारी जाधव (वय ४०) यांच्याकडे देण्यास सांगितले. शिवाय तलाठी पवार यांच्या सांगण्यावरून योगेश साबळे व छोटू जाधव यांनी तक्रारदाराकडे पैशांची मागणी केली.या प्रकरणी निजामपूर पोलिसांत नोंद केली आहे. दरम्यान, नंदुरबार लाचलुचपत पथकाने हा गुन्हा आता धुळे लाचलुचपत प्रतिबंधक विभागाकडे वर्ग केला आहे.
