चाळीसगाव (प्रतिनिधी) सचिव व मुख्याध्यापकासह क्लार्कने शिक्षक व शिक्षकेतर कर्मचारी व शासनाचे फसवणूक करून 97 लाख रुपये लाटण्यात आले आहे. याप्रकरणी चाळीसगाव पोलीस स्थानकात सचिव व मुख्यध्यापकासह क्लार्कविरुद्ध गुन्हा दाखल करण्यात आला होता. तसेच आता या संस्थेच्या सचिव विरुद्ध दुसरा गुन्हा दाखल झाला आहे.
दरम्यान, संस्थेचे सचिव अशोक हरी खलाणे यांचा चाळीसगाव प्रथमवर्ग न्यायदंडाधिकारी यांनी जामीन अर्ज फेटाळला आहे. तसेच अशोक खलाणे यांना दुसऱ्या गुन्ह्याच्या तपासासाठी जळगाव सब जेलमधून चाळीसगाव येथे आणण्यात येणार आहे.
काय आहे प्रकरण ?
विलास भोई हे जिल्हा परिषद प्राथमिक शाळेचे कामकाज पाहतात. चाळीसगाव शहरात महात्मा फुले सामाजिक व शैक्षणिक विकास मंडळ संचलित जय हिंद माध्यमिक व उच्च माध्यमिक विद्यालय ही शाळा मालेगाव रोड लगत आहे. ही शिक्षण संस्था खाजगी अनुदानित असून सध्या या संस्थेचे सचिव अशोक हरी खलाणे (रा. नेताजी चौक चाळीसगाव) हे असून मुख्याध्यापक अभिजीत जगन्नाथ खलाणे (रा. धुळे रोड जयहिंद हायस्कूलजवळ चाळीसगाव) व क्लर्क ज्ञानेश्वर दगा महाजन (रा. तेजस कोणार्क धुळे रोड चाळीसगाव) हे आहेत. शिक्षण संस्थेतील सर्व कामकाज हेच पाहतात. दरम्यान जय हिंद माध्यमिक व उच्च माध्यमिक विद्यालयातील शिक्षक व शिक्षकेतर कर्मचारी यांचे शासनाकडून येणाऱ्या पगाराच्या अनुदानातून सचिव, मुख्याध्यापक व क्लर्क यांनी काही शिक्षकांना नोकरीवरून काढून टाकण्याची धमकी दिली. एवढेच नाही तर बळजबरीने संमती पत्रावर सह्या घेतल्या आहेत व काही शिक्षकांची कोणत्याही प्रकारे संमती न घेता बेकायदेशीररित्या व शासनाचा कोणताही नियम व आदेश 2006 पासून ते डिसेंबर 2024 पर्यंत शिक्षक शिक्षकेतर कर्मचारी यांच्या पगारातून स्वतःच्या फायद्यासाठी रक्कम कपात केली आहे. एकूण 15 शिक्षक व शिक्षकेतर कर्मचाऱ्यांच्या पगाराच्या अनुदानातून 97,01,100 रुपये इतकी रक्कम कपात करण्यात आलेली आहे. याप्रकरणी चाळीसगाव तालुका पंचायत समितीतील तालुका विस्तार अधिकारी विलास आनंदा भोई वय (50 रा. उंटवाडी तिळकेनगर, नाशिक) यांनी फिर्याद दिलेली आहे.
अशोक खलाणेविरुद्ध दुसरा गुन्हा दाखल
पृथ्वीराज अमरसिंग चव्हाण यांनी दिलेल्या फिर्यादीत म्हटले आहे की, ते सन 2009 ते 2012 महात्मा फुले सामाजिक व शैक्षणिक विकास मंडळ संचलित सम्राट अशोक विद्यालय, चाळीसगाव येथे व्याख्याता होते. त्यानंतर 2012 पासून ते जयहिंद विद्यालय, चाळीसगाव येथे कनिष्ठ व्याख्याता म्हणून काम करत होते. 20 फेब्रुवारी 2025 पासून संस्थेचे सचिव अशोक हरी खलाणे यांनी त्यांची सेवा समाप्त केली. पृथ्वीराज यांनी 2012 ते 2020 पर्यंत बिनपगारी सेवा दिली. त्यांचे मित्र डॉ. प्रकाश मांगीलाल राठोड यांनी माहितीच्या अधिकारात पगार पत्रकाची माहिती मिळवली आणि त्यात पृथ्वीराज यांच्या नावावर 2019 मध्ये पगार दाखवला. तथापि, त्यांचा पगार पत्रकावर सही किंवा नियुक्ती नसतानाही त्यांचे नाव वापरून 37 हजार रुपये बनावट पगार दिला गेला. त्याचप्रमाणे, 2017 मध्ये मयत झालेले प्राध्यापक राजेश अरुण ढाके यांचे नाव पगार पत्रकावर दाखवून त्यांचा बनावट पगार केला गेला. याप्रकरणी चाळीसगाव पोलीस स्थानकात अशोक खलाणे यांच्या विरुद्ध गुन्हा दाखल करण्यात आलेला आहे.
