चिकसे प्रतिनिधी : महात्मा गांधी राष्ट्रीय रोजगार हमी योजनेअंतर्गत मंजूर झालेल्या विहिरीच्या कामाचे उर्वरित अनुदान मिळवून देण्यासाठी, मोजमाप पुस्तिकेत नोंद करण्याच्या बदल्यात १० हजार रुपयांची लाच स्वीकारताना साक्री पंचायत समितीचा तांत्रिक सहायक नितीन नारायण वारकर याला लाचलुचपत प्रतिबंधक विभागाने (एसीबी) गुरुवारी (दि.३०) रंगेहाथ पकडले. या कारवाईमुळे जिल्हा परिषदेच्या बांधकाम विभागात खळबळ उडाली आहे.
याबाबत मिळालेली माहिती अशी की, तक्रारदार यांच्या भावाच्या नावे सन २०२३-२४ मध्ये ४ लाख रुपये खर्चाची विहीर मंजूर झाली होती. साक्री पंचायत समितीच्या गटविकास अधिकाऱ्यांनी ८ नोव्हेंबर २०२३ रोजी या कामाचा कार्यारंभआदेश दिला होता. विहिरीचे काम
पूर्ण झाल्यानंतर तक्रारदाराला काही प्रमाणात अनुदान मिळाले होते. मात्र, उर्वरित १ लाख ६२ हजार ३२० रुपयांचे अनुदान मिळवण्यासाठी मोजमाप पुस्तिकेची (एम.बी.) प्रक्रिया पूर्ण करणे आवश्यक होते.
पंधरा हजारांची मागणी, १० हजारात तडजोड
तक्रारदार जेव्हा पंचायत समितीचे तांत्रिक सहायक नितीन वारकर (४२) याला भेटले, तेव्हा त्याने मोजमाप पुस्तिका तपासून अनुदान मंजूर करण्यासाठी १५ हजार रुपयांच्या लाचेची मागणी केली. लाच देण्याची इच्छा नसल्याने तक्रारदाराने धुळे ‘एसीबी’कडे धाव घेतली. गुरुवारी (दि. ३०) एसीबीने तक्रारीची शहानिशा केली असता, तांत्रिक सहायक वारकर याने तडजोडीअंती १० हजार रुपये स्वीकारण्याचे मान्य केले.
साक्रीत रचला सापळा
साक्री परिसरात लावलेल्या सापळ्यात तक्रारदाराकडून १० हजार रुपये स्वीकारताना नितीन वारकर याला पथकाने रंगेहाथ पकडले. त्याच्यावर साक्री पोलीस ठाण्यात गुन्हा दाखल करण्याची प्रक्रिया रात्री उशिरापर्यंत सुरू होती. आरोपी तांत्रिक सहायक वारकर हा धुळ्यातील बाहुली नगर परिसरातील रहिवासी आहे.
ही कारवाई नाशिक परिक्षेत्राचे पोलीस अधीक्षक भारत तांगडे, अपर अधीक्षक माधव रेड्डी, सुनील डोरे यांच्या मार्गदर्शनाखाली धुळे एसीबीचे अधिकारी सचिन साळवे व त्यांच्या पथकातील राजन कदम, मुकेश अहिरे, संतोष पाडवी, प्रवीण मोरे, मकरंद पाटील, प्रवीण पाटील, प्रशांत चौधरी, चंद्रकांत सैंदाणे, रेशमा परदेशी, सुधीर मोरे व जगदीश बदगुजर यांनी यशस्वी केली.
