सोलापूर (वृत्तसंस्था) कर्नाटकातून सोलापूरकडे लग्नाचे वऱ्हाड घेऊन निघालेल्या पिकअप गाडीला झालेल्या भीषण अपघातात एक जण जागेवर ठार, तर तीन जण जखमी झाल्याची घटना ९ मे रोजी मैदर्गी ते दुधनी (ता. अक्कलकोट) रस्त्यावर घडली. शिवाप्पा हणमंत जोगूर (वय ३० वर्षे, बिदणुर ता. अफजलपूर जि. कलबुरगी, कर्नाटक) असे मृत वधूच्या काकाचे नाव आहे.
या संदर्भात अधिक असे की, मंगळवारी सकाळी १० वाजेच्या सुमारास पिकअप गाडी (क्र. केए ३६ बी २८२१) या वाहनातून चालक व्हणाप्पा देवेंद्र डोंगरी हे लग्नाचे वऱ्हाड घेऊन सोलापूरच्या दिशेने निघाले होते. अफझलपूर ते मैंदर्गी (ता. अक्कलकोट) शिवारातील शिवमल्हार धाब्याजवळील लक्ष्मी मंदिराच्या कट्ट्यास पिकअपची धडक बसल्याने गाडी उलटली. या अपघातात शिवाप्पा हणमंत जोगूर (वय ३०, बिदणूर, ता. अफजलपूर, जि. गुलबर्गा) हे जागीच ठार झाले. तर श्यामकुमार श्रीमंत चिकलगी, कुमार मुतप्पा जोगूर, शाहीकुमार दिगंबर हडपद (सर्व रा. बिदणूर) हे जखमी झालेत. दरम्यान, या अपघातानंतर चालक व्हणाप्पा डोंगरी हा घटनास्थळावरून पळून गेला.
अपघातग्रस्त वाहनात साधारण २५ वऱ्हाडी होते. या गाडीच्या अगोदर एक जीप लग्नस्थळी गेली होती. त्या गाडीमध्ये वधूची आई-वडील तसेच इतर पाहुणे होते. अपघातामधील गाडीत वधूचे काका शिवप्पा जोगूर हे होते. गाडीला उशीर होत असल्यामुळे सोलापूर येथील नातेवाइकांनी फोन केल्यानंतर किरकोळ अपघात झाल्याचे सांगण्यात आले. परंतू वधूचे वडील जय्यप्पा जोगूर यांना शंका येऊ लागल्यानंतर त्यांनी पत्नीस सोबत घेऊन अपघातस्थळ गाठल्यावर त्यांना मात्र, धक्का पोहचला. यानंतर छोटा अपघात झाल्याचे सांगून विवाह सोहळा संपन्न करण्यात आला.
