बोदवड (प्रतिनिधी) गणिताच्या संकल्पना व्यवस्थितपणे समजून घेतल्यास गणित विषय देखील खूप आनंददायी होऊ शकतो.त्यातून आकलनशक्ती वाढून सृजनशीलतेला चालना मिळू शकते.त्यामुळे कोणताही विषय समजायला गणिताची मदत होऊ शकते. त्यामुळे जास्तीत जास्त विद्यार्थ्यांनी गणितात करिअर करावे असे आवाहन .कनिष्ठ महाविद्यालयाचे प्रा .एच. एल. पाटील यांनी केले.बोदवड कला, वाणिज्य, व विज्ञान महाविद्यालयात आयोजित गणितीय पोस्टर स्पर्धेच्या उद्घाटन प्रसंगी ते बोलत होते.
संस्थेचे चेअरमन मिठूलालजी अग्रवाल यांच्या प्रोत्साहनातून तसेच महाविद्यालयाचे प्राचार्य प्राध्यापक अरविंद चौधरी यांच्या नेतृत्वाखाली सदर गणितीय पोस्टर स्पर्धेचे आयोजीत या कार्यक्रमाचे अध्यक्षस्थानी डॉ. चेतनकुमार शर्मा होते. गणिताची भीती दूर व्हावी आणि गणिताच्या सहाय्याने मेंदूचा विकास व्हावा या उद्देशाने गणितीय पोस्टर स्पर्धा गणित विभागातर्फे घेण्यात आली. सदर पोस्टर स्पर्धेत गणिताचे दैनंदिन जीवनातील विविध उपयोग, गणितातील विविध मनोरंजक कोडी, बारकोड , क्यूआरकोड ,गमतीजमती तसेच गणिताचा संगीत, वैद्यकीय, शेती, हवामानशास्त्र ,व्यापार क्षेत्रात तसेच उपग्रह प्रक्षेपणसाठी, अर्थशास्त्रामध्ये, शेअर बाजारामध्ये कश्याप्रकारे वापर होतो याविषयांवर पोस्टर विद्यार्थ्यांनी तयार केली होती.
महाकाय जहाजांचा तोल साधण्यासाठी कोणती गणिते करावी लागतात, भरती ओहोटीचे गणित कसे असते, निवडणूक प्रक्रियांच्या नियोजनात सुसूत्रता आणण्यासाठी गणिताचे तर्क कसे प्रकारे वापरतात, व्यापारामध्ये अर्थशास्त्रामध्ये आयुर्विमा क्षेत्रामध्ये व्यक्तीच्या मृत्यूची संभाव्यता लक्षात घेऊन गणिती प्रारूपे कशी तयार करतात, संगणकशास्त्रातील सर्च इंजिनमध्ये गणिताच्या उपयोग कसा होतो, गणिताची ऑपरेशन रिसर्च शाखा कशी उपयोगी पडते, त्सुनामी याविषयी अंदाज आणि त्याची तीव्रता जाणून घेण्यासाठी गणिताचा कसा वापर होतो, मोबीअसपट्टीचा वापर वापरून न संपणारी ध्वनीमुद्रका कशी बनवली जाते. विद्यार्थ्यांनी निसर्गात आढणाऱ्या गोल्डन रेशो, गोल्डन रेक्टांगल यांचा गुगल ,पेप्सी,फेसबुक यांसारख्या विविध कंपन्यांचे लोगो तसेच स्थापत्य शास्त्रात डिझाईन बनवण्यासाठीचे होणारे उपयोग गोष्टींवर पोस्टर बनवितांना भर दिला. पोस्टर्स स्पर्धेचे परीक्षण प्राध्यापक एच. एल. पाटील आणि डॉ.अनिल बारी यांनी केले.
प्रास्ताविकात गणिताचे महत्त्व आणि गणिताविषयी जागृती करणे हा उद्देश पोस्टरस्पर्धेचा असल्याचे विभागप्रमुख डॉ.रुपेश मोरे यांनी नमूद केले .कार्यक्रमाचे सूत्रसंचालन सौ. रूपाली चौधरी यांनी केले तर आभारप्रदर्शन प्राची चौधरी यांनी केले. सदर पोस्टरस्पर्धेला 42 हून अधिक विद्यार्थ्यांनी स्वतः पोस्टर तयार केली होती. यावेळी या पोस्टर प्रदर्शनास वरिष्ठ महाविद्यालयासह कनिष्ठ महाविद्यालयातील विज्ञान शाखेतील तीनशेहून अधिक विद्यार्थ्यांनी भेट देऊन संकल्पना समजून घेतल्या. प्रथम वर्ष विज्ञान गटातुन प्रीती हिम्मतसिंग पाटील, प्रीती सुधाकर माळी, रुतुजा दिलीप पाटील यांनी अनुक्रमे प्रथम, द्वितीय, तृतीय क्रमांक पटकावला. द्वितीय वर्ष विज्ञान गटातून गायत्री दिलीप चौधरी आणि आरती गणेश धांडे यांनी संयुक्तिकपणे प्रथम क्रमांक पटकावला . चंचल सुपडू बडगुजर व मुक्ता ईश्वर ताठे यांनी संयुक्तिकपणे द्वितीय क्रमांकाचे बक्षीस मिळवले तर पवन नाना पाटील आणि शुभम भगवानसिंग राजपूत यांनी संयुक्तिकपणे तृतीय क्रमांकाचे पारितोषिक मिळवले.
कार्यक्रमासाठी योगेश व्यवहारे ,रुपाली चौधरी ,प्राध्यापक प्रभाकर महाले,डॉ. वंदना नंदवे, डॉ गीता पाटील,श्री.विशाल जोशी,नरेंद्र जोशी,डॉ.अजय पाटील,सौ.हेमलता कोटेचा ,डॉ.अमर वाघमोडे,शरद पाटील आदि प्रमुख पाहुणे म्हणून उपस्थित होते. कार्यक्रम यशस्वीतेसाठी कार्यालय अधीक्षक बाबुराव हिवराळे, दीपक जोशी , वैभव माटे,शेखरसिंग चव्हाण,वैभव कासार , योगेश राजपूत , जितेंद्र बडगुजर, विजू धोबी, अतुल पाटील, समीर पाटील, यश बोदडे,गायत्री तळले ,श्रद्धा बोरोले, निकिता मोंढाळकर ,भावना माळी ,साक्षी माळी,वैष्णवी बडगुजर तसेच महाविद्यालयातील सर्व कर्मचारीवर्गाने व विद्यार्थ्यांनी परिश्रम घेतले.
