जळगाव (प्रतिनिधी) – नातेवाईकांकडे वाढदिवसाच्या कार्यक्रमासाठी बाहे र गावी गेलेल्या महावितरणमधील कर्मचारी पंकज सुरेश भावसार (वय ४१, रा. रायसोनी नगर) यांच्या घरात चोरट्यांनी डल्ला मारला. याठिकाणाहून त्यांनी सोने-चांदीच्या दागिन्यांसह रोकड असा एकूण ५५ हजार रुपयांचा ऐवज चोरुन नेला. ही घटना दि. १८ मे रोजी उघडकीस आली. याप्रकरणी रामानंद नगर पोलीस ठाण्यात गुन्हा दाखल करण्यात आला आहे.
शहरातील रायसोनी नगरात राहणारे पंकज भावसार हे महावितरणमध्ये नोकरीस आहे. दि. १५ मे रोजी कुटुंबियांसह ते छत्रपती संभाजी नगर येथे एका नातेवाईकांकडे वाढदिवसाच्या कार्यक्रमासाठी गेले होते. यावेळी त्यांचे तीन दिवस बंद असल्याची संधी साधत चोरट्यांनी त्यांच्या घराचा समोरील आणि मागील दरवाजाचे कुलूप तोडून आत प्रवेश केला. त्यानंतर घरातील सामान अस्ताव्यस्त फेकून देत कपाटात ठेवलेली ४० हजार रुपयांची रोकड आणि सोने-चांदीचे दागिने चोरुन नेले. दि. १८ मे रोजी भावसार यांच्या शेजारी राहणाऱ्यांना भावसार यांच्या घराचे कुलूप तुटलेले दिसल्याने त्यांच्या घरात चोरी झाल्याचे समजले. त्यांनी घटनेची माहिती लागलीच पंकज भावसार यांना फोनद्वारे दिली.
पोलिसांची घटनास्थळी पाहणी
घरात चोरी झाल्याची माहिती मिळाल्यानंतर पंकज भावसार यांचे लहान भाऊ निलेश भावसार हे मु.जे महाविद्यालयातील एका कार्यशाळेनिमित्त तीन दिवसांपासून मुक्कामी होते. पंकज यांनी त्यांना तात्काळ घरी जाण्यास सांगितले निलेश भावसार यांनी तातडीने घटनास्थळी धाव घेत घराची पाहणी केली आणि रामानंदनगर पोलिसांना घटनेची माहिती दिली. या प्रकरणी, पंकज भावसार यांनी दि. २० मे रोजी रामानंदनगर पोलीस ठाण्यात दिलेल्या फिर्यादीवरून पोलिसांनी अज्ञात चोरट्यांविरुद्ध चोरीचा गुन्हा दाखल केला आहे.
