जळगाव (प्रतिनिधी) – सोशल मीडियावरून मिळविलेले विद्यार्थिनीचे फोटो व तिच्या संवादाची क्लिप व्हायरल करण्याची धमकी देऊन तिच्याकडे शरीरसुखाची मागणी करीत विनयभंग केला. तसेच तिच्या आई-वडिलांना मारण्याचीही धमकी देऊन तिच्याकडून वेळोवेळी एक लाख रुपयांपेक्षा अधिक रक्कम उकळली. ही घटना दि. १५ एप्रिल २०२५ पासून ते दि. १९ मे २०२६ दरम्यान घडली. या प्रकरणी नीलेश हिरामण मराठे (रा. आसोदा, ता. जळगाव) याच्याविरुद्ध तालुका पोलिस ठाण्यात गुन्हा दाखल करण्यात आला आहे.
तालुक्यातील एका गावातील १९ वर्षीय विद्यार्थिनी जळगाव येथे एका महाविद्यालयात शिक्षण घेत आहे. त्या विद्यार्थीनीचे सोशल मीडियावर अकाऊंट असून त्यावरून संशयित नीलेश मराठे याने फोटो मिळविले. तसेच तिच्याशी मोबाईलवर संपर्क साधून बोलू लागला. त्यानंतर त्याने मिळविलेले फोटो व संवादाची क्लिप व्हायरल करण्यासह तिच्या आई-वडिलांना मारुन टाकण्याची धमकी देऊन शरीरसुखाची मागणी केली. वर्षभरापासून तो विद्यार्थिनीचा विनयभंगही करीत होता.
गैरकृत्य अन् उकळले पैसे
संशयिताने विद्यार्थिनीशी गैरकृत्य करण्यासह त्याने वेळोवेळी तिच्याकडून एक लाख रुपयांपेक्षा अधिक रक्कम उकळली. त्यानंतर त्याने दि. १९ मे रोजी पुन्हा २५ हजार रुपये मागितले. वारंवार होणाऱ्या या मानसिक त्रासाला कंटाळून विद्यार्थिनीने तालुका पोलिस ठाण्यात फिर्याद दिली. त्यावरून नीलेश मराठे याच्याविरुद्ध गुन्हा दाखल करण्यात आला आहे. तपास सहायक फौजदार सुनील पाटील करीत आहेत.
