जळगाव (प्रतिनिधी) – शॉर्टसर्कीटमुळे चटई कंपनीच्या गोडावूनला आग लागली. काही वेळातच आगीने रौद्ररुप धारण करीत आजूबाजूच्या तीन कंपन्यांना देखील विळख्यात घेतले. या आगीमुळे एका कंपनीतील पाच गॅस सिलींडरचा स्फोट झाल्यामुळे संपुर्ण परिसर हादरुन गेला होता. यामध्ये कंपनीत तयार झालेल्या मालासह मशिनरी जळून खाक झाले. आग ही चौथ्या कंपनी पर्यंत पोहचणार त्यापुर्वीच नियंत्रण मिळविल्यामुळे ती कंपनी सुरक्षीत राहीली. ज्याठिकाणी ही आग लागली त्याच्या समोर गॅस सिलींडरचे गोदाम आहे. आग लागल्यानंतर सिलींडरचा स्फोट झाल्यामुळे परिसरात खळबळ माजून गेली. परंतू कर्मचाऱ्यांनी प्रसंगावधान राखत गॅस गोडावूनच्या बाहेर असलेल्या वाहने तात्काळ तेथून दूर अंतरावर नेवून उभी केली. ही घटना शनिवार दि. २ मे रोजी दुपारी साडेचार वाजेच्या सुमारास जे सेक्टरमध्ये घडली. कंपन्यांना सुटी असल्यामुळे सुदैवाने कंपनीत कामगार नव्हते. त्यामुळे कोणालाही दुखापत झाली नाही.
शहरातील एमआयडीसी परिसरातील जे – ४० सेक्टरमध्ये दिग्विजय बनवट यांच्या मालकिची नवकार चटई नावाची कंपनी असून त्याच्या शेजारी त्यांनी भाडेतत्वावर तयार झालेला माल ठेवण्याकरीता गोदाम घेतले आहे. शनिवारी दुपारच्या सुमारास अचानक शॉर्टसर्कीटमुळे गोदामाला आग लागली. काही वेळातच आगीने रौद्ररुप धारण केल्यानंतर आगीने शेजारी असलेल्या पावडर कोटींग करणाऱ्या कंपनीला आगीच्या विळख्यात घेतले. त्यामुळे याठिकाणी असलेले गॅस सिलींडरचा स्फोट झाला एकापाठोपाठ एक असे एकूण पाच सिलींडरचा स्फोट झाल्यामुळे आगीच्या ज्वाला आणि धूराचे लोळ उंचच उंच आकाश उडत होते, प्लास्टीक असल्यामुळे ही आग अधिकच भडकली. त्यामुळे
कंपनीतील तयार व कच्चा माल आगीत सापडला. प्लास्टिक माल व त्यात सिलिंडरचा स्फोट झाल्याने ही आग शेजारी असलेल्या सोपान अटक यांच्या मालकीच्या श्रीनिवास पॉलिमर्स कंपनीपर्यंत पोहचली. परंतू ही कंपनी आग लागलेल्या – कंपनीपासून दूर असल्यामुळे येथे लवकर आगीवर नियंत्रण – मिळविण्यात आले.
हेअर ऑईलच्या कंपनीपर्यंत पोहचली आग
जे ४० सेक्टरमधील कंपन्यांची ही आग त्यांच्या पाठीमागेच असलेल्या जे ४७ सेक्टरमधील जे ब्रदर्स या हेअर ऑईल – कंपनीपर्यंत पोहचली. आगीने या कंपनीला आपल्या विळख्यात घेत असतांना महापालिका अग्निशमन विभागाचा बंब घटनास्थळी दाखल झाला. तर दुसरीकडे भारत गॅस गोडावूनमधून थेट दोन पाईप जोडून कर्मचाऱ्यांनी आगीवर नियंत्रण मिळवले. या – आगीत कंपनीचे किरकोळ नुकसान झाले असल्याची माहिती कंपनी मालक विनय जगवानी यांनी दिली.
मदतीसाठी धावले गॅस कंपनीतील कर्मचारी
गॅस गोदामाच्या समोरील कंपनीला आग लागताच भारत – गॅस प्लांटमधील कर्मचाऱ्यांनी धाव घेत आग विझविण्यासाठी धाव घेतली. या प्लांटमधील उत्पादन थांबवून जवळपास – ५० कर्मचारी घटनास्थळी दाखल झाले. त्यांनी प्लांटमधील – अग्निशमन यंत्रणेचे पाईप या कंपन्यांपर्यंत जोडून पाण्याचा मारा करीत आग विझविण्यासाठी मदत केली. त्या कर्मचाऱ्यांनी मदतीचा हात दिला नसता तर आगीने आणखीन रौद्र रुप धारण करीत इतर कंपन्यांपर्यंत आग पोहचली असती.
दोन तासानंतर मिळविले आगीवर नियंत्रण
आग विझविण्यासाठी महापालिका अग्नीशमन दलाचे, जैन इरिगेशनचे एकूण १० ते १५ बंब घटनास्थळी पोहचले. बंब रिकामे झाल्यानंतर ते तात्काळ गॅस गोदामासह रेमण्ड व इतर कंपन्यांमधून भरुन घटनास्थळी आणले जात होते. सुमारे ३० ते ४० बंबांसह फोमचा मारा केल्यानंतर दोन तासानंतर आगीवर नियंत्रण मिळविण्यात आले. तसेच विशेष म्हणजे गॅस प्लांटमधून कंपन्यांजवळ उभ्या बंबांपर्यंत पाईप टाकून बंबांमध्ये पाणी भरले जात होते.
अग्निशमन विभागाची तत्परता
आगीवर नियंत्रण मिळविण्याकरीता महापालिकेतील एमआयडीसी परिसरातील अग्निशमन विभागातील प्रदीप धनगर, निवांत इंगळे, योगेश कोल्हे, राकेश सोनवणे, किरण पाटील, रितेश पाटील, केतन पाटील, दीपक पाटील, भुषण पाटील, शोएब तडवी, नितीन ससाणे यांच्यासह भारत गॅसमधील कर्मचाऱ्यांनी मदत केली.
