मुंबई वृत्त संस्था | विधानसभा अध्यक्ष पदाच्या निवडणुकीत शिंदे गटाच्या आमदारांनी पक्षाचा आदेश धुडकावत भाजपा आमदार राहुल नार्वेकर यांच्या बाजूने कौल दिला होता त्यामुळे शिवसेना पक्षाने थेट या ३९ बंडखोर आमदारांविरोधात विधानसभा अध्यक्षांकडे निलंबन याचिका दाखल केली आहे. पक्षाने व्हीप बजावूनही ३९ आमदारांनी पक्षादेश डावलून मतदान केलं आहे.
तसेच बंडखोर आमदारांच्या या संबंधीचं कृत्याचा व्हिडीओ रेकॉर्ड उपलब्ध आहे. सदरील आमदारांवर अपात्रतेची कारवाई करण्यात यावी, अशी मागणी शिवसेनेचे प्रतोद सुनील प्रभू यांनी नवनिर्वाचित विधानसभा अध्यक्ष राहुल नार्वेकर यांच्याकडे केली आहे. ९ दिवसाच्या सत्तासंघर्षानंतर रविवारी विधानसभेच्या नव्या अध्यक्षांची निवड करण्यात आली.
यावेळी बंडखोरी टाळण्यासाठी विधानसभेत आवाजी पद्धतीने घेण्यात आले. तसेच मतदानात राहुल नार्वेकर यांनी १६४ मते मिळवत विजय संपादन केला. शिवेसेनेच्या सर्वच्या सर्व बंडखोर आमदारांनी भाजपच्या राहुल नार्वेकर यांना मतदान केलं. व्हीप बजावल्यानंतर बंडखोरांपैकी काही मते आपल्या बाजूने वळतील, अशी शिवसेनेला आशा होती मात्र त्यावर बंडखोर आमदारांना नार्वेकरांच्या बाजूने मतदान करत शिवसेनेला जोरदार धक्का दिला.
बंडखोर आमदारांच्या या कृत्यामुळे राजन साळवी यांचा पराभव झाला. ज्यानंतर शिवसेनेने आक्रमक पाऊल उचलत बंडखोरांविरोधात अपात्रतेची याचिका दाखल केली आहे. शिवसेनेच्या ३९ आमदारांनी व्हिपच्या विरोधात मतदान केलं. याच पार्श्वभूमीवर ३९ आमदारांच्या निलंबनाची याचिका आम्ही विधानसभा अध्यक्षांकडे दाखल केली आहे. संबंधित आमदारांवर अपात्रतेची कारवाई करावी, अशी मागणी आम्ही विधानसभा अध्यक्षांकडे केली आहे, अशी माहिती शिवसेना खासदार अरविंद सावंत यांनी दिली. ते पत्रकार परिषदेत बोलत होते.
