जळगाव (प्रतिनिधी) – घरी जात असताना मित्र दिसल्याने तेथे थांबून विचारपूस केल्याने राजेंद्र केशव लकडे (वय २६, रा. गवळीवाडा, तांबापुरा) यांच्यावर दगडफेक करून त्यांचे डोके फोडण्यात आले. ही घटना दि. १७ जून रोजी रात्री बिसमिल्ला चौकात घडली. दरम्यान, याच चौकात महिलेच्या घरात घुसून तोडफोड केल्याच्या घटनेप्रकरणी दाखल गुन्ह्यानंतर तेथेच झालेल्या या वादाप्रकरणी दि. १९ जून रोजी गुन्हा दाखल झाला आहे.
शहरातील तांबापुरा परिसरातील गवळीवाडा परिसरातील राजेंद्र लकडे यांचा दूध विक्रीचा व्यवसाय आहे. दि. १७ रोजी रात्री ते दूध वाटप करून घरी परतत होते. त्या वेळी त्यांना त्यांचा मित्र विनोद हटकर व त्याचे मित्र दिसले. त्यावेळी त्यांचा इतरांशी वाद सुरू होता. लकडे हे तेथे थांबले व विनोद याला विचारणा करीत असताना दुसऱ्या बाजूला असलेले साहील काकर व त्याच्या मित्रांनी लकडे यांना शिवीगाळ केली. त्यांनी ‘याचे डोके फोडा’ असे म्हणत लकडे यांच्या दिशेने दगडफेक सुरू केली. त्यात त्यांच्या डोक्याला दुखापत होऊन रक्तस्त्राव झाला.
टोळक्याविरुद्ध एमआयडीसी पोलिसात गुन्हा
या प्रकरणी राजेंद्र लकडे यांनी दि. १९ जून रोजी एमआयडीसी पोलिस ठाण्यात फिर्याद दिली. त्यावरून साहील काकर, सैईद काकर, भुऱ्या बागवान, बबल्या डॉन, तौसीफ शेख व इतर दोन ते तीन जणांविरुद्ध गुन्हा दाखल करण्यात आला आहे. तपास उपनिरीक्षक राजेंद्र उगले करीत आहेत.
परस्परविरोधात गुन्हा दाखल
दि. १७ रोजी रात्री बिसमिल्ला चौकात महिलेच्या घराची तोडफोड केल्याप्रकरणी गुन्हा दाखल असलेल्यांमधील विनोद हटकर याचाच हा दूध विक्रेता मित्र आहे. महिलेच्या तक्रारीवरून एक गुन्हा दाखल झाल्यानंतर याच चौकातील वाद प्रकरणी ही दुसऱ्या गटाने तक्रार दिली असून त्यानुसार परस्परविरोधात गुन्हा दाखल करण्यात आला आहे.
