धरणगाव (प्रतिनिधी) येथील गुड शेपर्ड इंग्लिश मिडियम स्कुलमध्ये ९ वी आणि १० वीच्या विद्यार्थांचे गुलाबपुष्प देऊन स्वागत करण्यात आले. कोरोनाच्या प्रदीर्घ कालावधीनंतर आज ८ डिसेंबर पासून शासनाच्या कोविड – १९ नियमावलीचे पालन करून ९ वी व १० वीचे वर्ग पूर्ववत सुरू करण्यात आले.
याबाबत सविस्तर माहिती अशी की, कोरोनाच्या जागतिक महामारीमुळे संपूर्ण जग थांबलं होतं. आता हळूहळू सर्व पूर्वपदावर येतांना दिसत आहे. अशा परिस्थितीत आज ८ डिसेंबर पासून ९ वी आणि १० वी चे वर्ग सुरू करण्याबाबत शासनाचे निर्देश प्राप्त झालेत. या आधीच सर्व विद्यार्थांचे संमती पत्र भरून घेण्यात आले होते. त्यानुसार आज सॅनिटायझिंग, कम्पलसरी मास्क, सोशल डिस्टनसिंग, थर्मल स्कॅनिंग, ऑक्सीमीटर या सर्व गोष्टींचा पडताळा घेऊन विद्यार्थांना प्रवेश देण्यात आला. वर्गात देखील एका बाकावर एक विद्यार्थी याप्रमाणे नियोजन करून प्रत्येक बाकावर रोल नं. टाकण्यात आले. १२:०० ते ०२:४० दरम्यान ४० मिनिटांच्या ४ तासिका याप्रमाणे वर्ग घेण्याची सुरवात झाली. आज पहिल्या दिवशी विद्यार्थांच्या उपस्थिती वरून त्यांच्यातील उत्साह पहायला मिळाला. विद्यार्थ्यांची मरगळ नाहीशी व्हावी व त्यांच्यात पुन्हा एकदा अभ्यासाची चांगली सुरवात व्हावी या उद्देशाने विद्यार्थ्यांचा सत्कार करण्यात आला. कार्यक्रमाच्या सुरवातीला ६ डिसेंबर म्हणजेच बाबासाहेबांचे महापरिनिर्वाण या घटनेचे स्मरण म्हणून भारतरत्न डॉ. बाबासाहेब आंबेडकर यांच्या प्रतिमेला जेष्ठ शिक्षक संतोष सूर्यवंशी यांच्या हस्ते माल्यार्पण करण्यात आले.
‘शिक्षण हे वाघिणीचे दूध आहे, ते पिल्यानंतर माणूस गुरगुरल्या वाचून राहत नाही’, असे बाबासाहेब म्हणायचे. याप्रमाणे आज महामानवाचे स्मरण करून शाळेच्या पहिल्या दिवसाची उत्साहात सुरवात झाली. शाळेच्या प्राचार्य चैताली रावतोळे व शाखा व्यवस्थापक जगन गावित यांच्या हस्ते विद्यार्थ्यांचा गुलाबपुष्प देऊन सत्कार करण्यात आला. याप्रसंगी १० वीच्या वर्गशिक्षिका भारती तिवारी, ९ वीच्या वर्गशिक्षिका नाजनिन शेख, जेष्ठ शिक्षक संतोष सूर्यवंशी, रिबेका फिलिप, सपना पाटील, लक्ष्मण पाटील, अमोल सोनार हे शिक्षकवृंद तसेच सरला पाटील, शितल सोनवणे, इंद्रसिंग पावरा, अमोल देशमुख, हे शिक्षकेतर कर्मचारी उपस्थित होते.
