रावेर (प्रतिनिधी) “तू काय माधुरी दीक्षित आहेस का? तुला एक दिवस उचलून घेऊन जाईन” अशी धमकी देत विवाहितेचा विनयभंग केल्याप्रकरणी रावेर पोलिसात दोघांविरुद्ध गुन्हा दाखल करण्यात आला आहे. पोलिसांनी दोघांना लगेचच अटक केली आहे.
रावेर तालुक्यातील एका गावात ३१ वर्षीय विवाहिता वास्तव्यास आहे. १० मे रोजी दुपारी १२ वाजेच्या सुमारास विवाहिता ही घराच्या ओट्यावर कपडे धुत होती. याचवेळी युनूस सायबू तडवी व इरफान नामदार तडवी हे दोघेही आले आणि आपसात बोलत उभे राहिले. यावर पिडीत विवाहितेने तुम्ही याठिकाणी काय उभे राहिले?, तुमच्या अंगावर पाणी उडाले तर तुम्ही उलट मलाच बोलणार असे म्हणाली. त्यावर युनूस हा विवाहितेकडे पाहून तू काय माधुरी दिक्षीत आहे काय?, एक दिवस तुला उचलून घेवून जाईन, असे म्हणाला.
तर सोबत असलेल्या इरफान हा देखील युनूसच्या बोलण्यात होकार देत एक दिवस तुला उचलून घेऊन जाऊ, असे म्हणाला. याचदरम्यान दोघांनी विवाहितेसोबत लज्जा उत्पन्न होईल असे कृत्य केलं. तसेच विवाहितेला शिवीगाळ करत जर कोणाला काही सांगितलं तर तुला जिवंत ठेवणार नाही, अशी धमकी देखील दोघांनी पिडीत विवाहितेला दिली. या घटनेप्रकरणी चार दिवसानंतर विवाहितेने रविवारी रावेर पोलीस ठाण्यात तक्रार दिली. या तक्रारीवरुन युनूस तडवी व इरफान तडवी या दोघांविरोधात विनयभंगांचा गुन्हा दाखल करण्यात आला असून युनूस तडवी, इरफान तडवी या दोघं संशयित आरोपींना पोलिसांनी अटक केली आहे.
