भडगाव (प्रतिनिधी) येथील महावितरण कार्यालयात असलेल्या उपकार्यकारी अभियंता यांच्या कॅबीनची तोडफोड करत मारहाण केल्याची घटना घडली. यात कर्तव्यावर असलेले वायरमन गजानन राणे यांचा या मारहाणीत मृत्यू झाला. दरम्यान, ऊर्जामंत्री नितीन राऊत यांनी ट्विट करत या घटनेबाबत दुःख व्यक्त करून कारवाईचे आश्वासन दिले आहे.
महावितरणचे तंत्रज्ञ गजानन राणे यांचा मारहाणीत मृत्यू झाला. याबाबत राज्याचे ऊर्जा मंत्री नितीन राऊत यांनी ट्विट करत घटनेबाबत दुःख व्यक्त केले. तसेच या घटनेतील दोषींवर कारवाई करण्यास प्रयत्नशील असल्याचे त्यांनी ट्विटमध्ये म्हटले आहे.
शिवसेनेचे आमदार किशोर पाटील यांनी महावितरणच्या कृषी पंपाच्या वीजबिलाची सक्तीने वसुली या विरोधात भडगाव व पाचोरा तालुक्यातील महावितरण कार्यालयात टाळे ठोक आंदोलन केले. त्याअनुषंगाने भडगाव येथील चाळीसगाव रस्त्यावरील महावितरणच्या कार्यालयात सकाळी अकरा ते साडे अकराच्या दरम्यान पोलिस बंदोबस्तात शिवसेनेतर्फे आंदोलन केले. मात्र हे आंदोलन झाल्यानंतर चाळीसगाव रस्त्यावरील महावितरण कार्यालयात उपकार्यकारी अभियंता अजय धामोरे यांच्या दालनात मोटारसायकलवर आलेल्या सात जणांनी प्रवेश करत त्यांना मारहाण केली. तर कॅबीनची ही तोडफोड केली.
यावेळी उपस्थित असलेले वरीष्ठ तंत्रज्ञ गजानन राणे हे उपकार्यकारी अभियंता अजय धामोरे यांना सोडविण्याच्या प्रयत्न करण्यासाठी गेले. यावेळी त्यांना ही या सात अज्ञांत हल्लेखोरांनी धक्काबुक्की केली. या धक्काबुक्कीत ते खाली पडले. त्यात त्यांचा मृत्यू झाला. त्यामुळे सात इसम राणे यांच्या मृत्यूस कारणीभुत ठरल्याचे, याशिवाय उपकार्यकारी अभियंता अजय धामारे यांना जीवे मारण्याचा प्रयत्न केल्याचे धामोरे यांनी पोलिसांत दिलेल्या तक्रारीत म्हंटले आहे.
