नवी दिल्ली (वृत्तसंस्था) भारतात कोरोनाचा कहर वाढत असून गेल्या २४ तासांत तीन लाखांहून अधिक कोरोना रुग्णांची नोंद झाली आहे. देशात पहिल्यांदाच बुधवारी एकूण ३ लाख १४ हजार ८३५ कोरोनाबाधित रुग्ण आढळले आहेत. तर याच २४ तासांत देशात तब्बल २ हजार १०४ कोरोनाबाधित रुग्णांनी आपले प्राण गमावले आहेत. देशात मंगळवारी एकूण १ लाख ७८ हजार ८४१ रुग्णांना रुग्णालयातून डिस्चार्ज देण्यात आला.
आरोग्य मंत्रालयाने दिलेल्या माहितीनुसार, देशात गेल्या २४ तासांत ३ लाख १४ हजार ८३५ कोरोना रुग्ण आढळले आहेत. तर २१०४ रुग्णांचा मृत्यू झाला आहे. कोणत्याही देशात एका दिवसात एवढी रुग्णसंख्या नोंद झालेली नाही. भारताच्या आधी अमेरिकेत एका दिवसात तीन लाखांहून अधिक रुग्णांची नोंद झाली होती. २ जानेवारी २०२१ ला अमेरिकेत ३ लाख ३१० रुग्ण आढळले होते.
भारतात सध्या रुग्णसंख्या १ कोटी ५९ लाख ३० हजार ९६५ वर पोहोचली आहे. तर आतापर्यंत १ कोटी ३४ लाख ५४ हजार ८८० रुग्ण उपचारानंतर बरे झाले आहेत. गेल्या २४ तासांत झालेल्या २१०४ मृत्यूनंतर एकूण मृतांची संख्या १ लाख ८४ हजार ६५७ वर पोहोचली आहे. देशात सध्याच्या घडीला २२ लाख ९१ हजार ४२८ अॅक्टिव्ह रुग्ण आहेत. तर आतापर्यंत देशभरात १३ कोटी २३ लाख ३० हजार ६४४ जणांचं लसीकरण झालं आहे.
महाराष्ट्र, दिल्ली, उत्तर प्रदेश, मध्य प्रदेशसह ११ राज्यांमध्ये परिस्थिती गंभीर होत आहे. या राज्यांमध्ये सर्वाधिक कोरोना रुग्ण आढळत आहेत. महाराष्ट्रात गेल्या २४ तासांत ६७,४६८ नवीन रुग्ण आढळले आहेत. ५४,९८५ रुग्ण बरे झाले आहेत आणि ५६८ जणांचा कोरोनाने मृत्यू झाला आहे. राज्यात आतापर्यंत ४०.२७ लाख लोक कोरोनाच्या विळख्यात आले आहेत. यातील ३२.६८ लाख रुग्ण बरे झाले आहेत. तर, ६१,९११ जणांचा मृत्यू झाला आहे. सध्या ६.९५ रुग्णांवर उपचार सुरू आहेत.
