जळगाव (प्रतिनिधी) – जून्या भांडणाच्या वादातून रेल्वे स्टेशनवर पायी जात असलेल्या सुजन राजेश बेंडवाल (वय २१, रा. गुरुनानक नगर, शनिपेठ) या तरुणाच्या डोक्यात लाकडी दांडका टाकून त्याच्यावर धारदार पट्टीने वार केले. ही घटना दि. १३ सप्टेंबर रोजी रात्री ९ वाजता शिवाजी नगर उड्डाणपुलाखालील रामदेव बाबा मंदिराजवळ घडली. याप्रकरणी मख्खन शिंदे व भुऱ्या शिंदे (रा. गुरुनानक नगर, शनिपेठ) या दोघांविरुद्ध गुन्हा दाखल करण्यात आला आहे.
शहरातील गुरुनानक नगरात सुजन बेंडवाल हा तरुण वास्तव्यास असून तो जिल्हा रुग्णालयात कंत्राटीपद्धतीने कामाला आहे. दि. १३ सप्टेंबर रोजी सायंकाळी कामावरुन घरी आल्यानंतर तो रात्रीच्या सुमारास त्यांच्या मोठ्या वडीलांना भेटण्याकरीता संभाजीनगरला रेल्वेने जाण्यासाठी निघाला. पायी रेल्वे स्टेशनकडे जात असतांना शिवाजी नगर उड्डाणपुलाच्याखाली असलेल्या रामदेव बाबा मंदिराजवळ सुजन बेंडवाल याच्या डोक्यात मख्खन शिंदे याने लाकडी दांडका मारला. त्यानंतर भुऱ्या शिंदे याने त्याच्याजवळील धारदार पट्टीने बेंडवाल याच्यावर वार करीत गंभीर जखमी केले.
‘तेरे को जान से मार डालूंगा’ म्हणत केला पाठलाग
दोघ भावांकडून मारहाण होत असल्याने सुजन बेंडवाल हा जखमी अवस्थेत घराकडे पळत सुटला. त्याच्या मागे संशयित मारेकरी पळत असतांना त्याला शिवीगाळ करीत तेरे को जान से मार डालूंगा असहे म्हणत धमकी देत होते.
उपचारानंतर दिली पोलिसात तक्रार
जखमी सुजन बेंडवाल याला त्याचा मोठ्या भावाने लागलीच जिल्हा रुग्णालयात दाखल केले. उपचार घेतल्यानंतर त्यांनी शहर पोलिसात तक्रार दिली. त्यानुसार संशयित मख्खन शिंदे व भुऱ्या शिंदे (रा. गुरुनानक नगर, शनिपेठ) या दोघांविरुद्ध गुन्हा दाखल करण्यात आला आहे. तपास पोहेकॉ प्रवीण वाघ हे करीत आहे.
