जळगाव (प्रतिनिधी) – इलेक्ट्रिक फिटिंगचे काम करताना विजेचा धक्का लागून तरुणाचा दुर्देवी मृत्यू झाला. मुस्तकीम आसिफ भैय्या पटेल (वय १९, रा. मासुमवाडी, जळगाव) असे मृताचे नाव आहे. शहरातील जोशीपेठ परिसरात शनिवारच्या या घटनेने परिसरात हळहळ व्यक्त करण्यात आली.
प्राप्त माहितीनुसार, मुस्तकीम हा एका ठेकेदाराकडे इलेक्ट्रिक कामावर कार्यरत होता. जोशीपेठेतील एका मंदिरात इलेक्ट्रिक फिटिंगचे काम गेल्या काही दिवसापासुन सुरू आहे. या कामावर मुस्तकीम हा कामावर जात होता. नेहमी प्रमाणे अन्य सहकाऱ्यांसोबत तो कामावर गेला होता.
वायर जोडणी करतांना सुरू झाला विद्युत प्रवाह
उंचावर चढुन विद्युत वायर जोडणीचे काम करत असतांना त्याचवेळी विद्युत प्रवाह सुरु झाला. त्यानंतर विजेचा धक्का लागुन हा तरुण उंचावरुन खाली कोसळला. आणि बेशुध्द झाला. हा प्रकार कामावरील अन्य सहकाऱ्यांच्या लक्षात येताच अत्यवस्थ तरुणाला तात्काळ उपचारासाठी शासकीय वैद्यकीय महाविद्यालय व रुग्णालयात हलविले असता तपासणीअंती डॉक्टरानी तरुणाला मृत घोषित केले. ही घटना कळताच कुटुंबियांसह नातेवाईकांना जबर धक्का बसला. आणि ते शोकमग्न झाले.
कुटूंबाची स्थिती आर्थिक बेताची
मुस्तफा याची कौटुंबिक आर्थिक परिस्थिती बेताची आहे. त्यामुळे हात मजुरी करुन तो कुटुंबाच्या उदरनिर्वाहाला हातभार लावत होता. त्याचे वडील मसाले विक्रीचा व्यवसाय करतात. मुस्तफा हा कष्टाळु आणि कोणाच्याही हाकेला धावुन जाणारा होता. ही घटना कळाल्यानंतर त्याच्या मित्रांसह स्नेहीजणांनी रुग्णालयात हळहळ व्यक्त केली. मासुमवाडी परिसरात शोककळा पसरली. त्याच्या पश्चात आई वडील, एक भाऊ एक बहिण असा परिवार आहे.
