नशिराबाद जळगाव ( प्रतिनिधी ) – भुसावळ येथून नशिराबादकडे येत असलेल्या पिकअपला नशिराबाद टोलनाक्याजवळ मागून भरधाव वेगाने आलेल्या कंटेनरने जबर धडक दिल्याने झालेल्या भीषण अपघातात पिकअपमधून खाली पडलेल्या सोनू रामा बागले (वय २७, रा. भवानीनगर, नशिराबाद) यांचा कंटेनरच्या चाकाखाली आल्याने जागीच मृत्यू झाला. या दुर्दैवी घटनेमुळे नशिराबादसह परिसरात शोककळा पसरली आहे.
नशिराबाद येथील रहिवासी सोनू बागले हे दिवसभर मजुरीचे काम आटोपून पिकअप (एमएच १९, वे बीएफ ६००१) ने नशिराबादकडे परत येत होते. दरम्यान, नशिराबाद टोलनाक्याजवळ मागून भरधाव वेगात आलेल्या कंटेनर (जीजे- १५, एजे-४६२९) ने पिकअपला जबर धडक दिली. या भीषण धडकेत सोनू बागले हे पिकअपमधून खाली फेकले गेले आणि त्याचवेळी कंटेनरच्या चाकाखाली आल्याने त्यांचा जागीच दुर्दैवी मृत्यू झाला. या दुर्दैवी घटनेमुळे नशिराबादसह परिसरात शोककळा पसरली आहे. दरम्यान, घटनेची माहिती मिळताच नशिराबाद पोलिसांनी तत्काळ घटनास्थळी धाव घेत पंचनामा करून पुढील कार्यवाही सुरू केली. या प्रकरणी नशिराबाद पोलीस ठाण्यात गुन्हा दाखल करण्याची प्रक्रिया रात्री उशिरापर्यंत सुरू होती. तर, या दुर्दैवी घटनेचा तपास नशिराबाद पोलीस स्टेशनचे कर्मचारी करत आहेत.
कुटुंबावर कोसळला दुःखाचा दुसरा डोंगर
या दुर्घटनेमुळे बागले कुटुंबावर पुन्हा एकदा दुःखाचा डोंगर कोसळला आहे. अवघ्या दोन महिन्यांपूर्वीच सोनू यांच्या बहिणीचे निधन झाले होते. त्या धक्क्यातून कुटुंब सावरत असतानाच आता सोनू यांचाही अपघाती मृत्यू झाल्याने बागले कुटुंबीयांवर मोठा आघात झाला आहे. बहिणीच्या पश्चात असलेल्या लहान भाच्याची जबाबदारी सोनू यांनी स्वीकारली होती. मात्र, त्यांच्या अकाली निधनामुळे त्या चिमुकल्याचाही आधार कायमचा हरपला आहे.
