धरणगाव (प्रतिनिधी) जळगाव ग्रामीण मतदार संघातील मराठा समाजातील मोठं प्रस्थ असलेले रमेश माणिक पाटील यांनी आज शिवसेनेत प्रवेश केला आहे. पक्षप्रमुख तथा माजी मुख्यमंत्री उद्धव ठाकरे यांच्या उपस्थितीत त्यांना संपर्क प्रमुख संजय सांवत यांनी शिवबंधन बांधले.
रमेश पाटील हे माजी जिल्हा परिषद सदस्य आहेत. त्यांच्याकडे याआधी राष्ट्रवादीत विधानसभा क्षेत्रप्रमुख म्हणून जबाबदारी होती. रमेश पाटील यांचा शिवसेनेतील प्रवेश जळगाव ग्रामीण मतदार संघातील राजकीय समीकरणातील मोठी घडामोड मानली जात आहे. रमेश पाटील यांना जळगाव ग्रामीणमध्ये मानणारा मोठा वर्ग आहे. तसेच ते मराठा समाजातील राजकीयदृष्ट्या एक मोठा चेहरा मानले जातात. विशेष म्हणजे धरणगाव तालुक्यात त्यांचे मोठे नाते-गोते आहे. दरम्यान, रमेश पाटील यांचा शिवसेनेत प्रवेशासाठी गुलाबराव वाघ यांनी त्यांचे मन वळविले होते.
रमेश माणिक पाटील यांच्यासोबत उमेश रावसाहेब पाटील, प्रवीण कौतिक पाटील, छोटू सुकदेव पाटील, शेतकरी नेते भाऊसाहेब सुकदेव सोनवणे, डॉ०.जुबेर खान, चेतन पुंडलिक सोनवणे यांनी आज शिवसेनेत प्रवेश केला. यावेळी जळगाव जिल्हा संपर्कप्रमुख संजय सावंत, सहसंपर्कप्रमुख गुलाबराव वाघ, जिल्हा प्रमुख विष्णू भंगाळे, महिला आघाडी जिल्हा प्रमुख महानंदा पाटील, उपमहापौर कुलभूषण पाटील, विरोधी पक्षनेते सुनिल महाजन, युवा सेना जिल्हाप्रमुख निलेश चौधरी, शरद तायडे, उपजिल्हा प्रमुख अँड. शरद माळी, राजेंद्र ठाकरे यांच्यासह आदी पदाधिकारी उपस्थित होते.
मी कोणत्याही अपेक्षेशिवाय आज घरवापसी केली आहे. खरं म्हणजे मी आज पक्षप्रवेश नव्हे तर, माझ्या मूळ घरात पुन्हा परतलो आहे. उद्धव साहेब ठाकरे यांच्या आदेशानुसार पक्षवाढीसाठी प्रयत्न करणार आहे. पक्षप्रवेशाआधीच मी माझ्या भावना सोशल मीडियात व्यक्त केल्या होत्या. त्याचवेळी राज्यातील लाखों लोकांसह शिवसैनिकांनी माझ्या भावना समजून घेतल्या होत्या.
– रमेश माणिक पाटील
