जळगाव (प्रतिनिधी) हृदय विकाराच्या झटका आल्याने तरुणाला रुग्णालयात दाखल करण्यापुर्वीच काही क्षणातच २६ वर्षीय तरुणाचा मृत्यू झाल्याची घटना शनिवारी दुपारच्या सुमारास घडली. भूषण किसन बोरसे (रा. आसोदा, ता. जळगाव), असे मयत तरुणाचे नाव आहे.
भूषण बोरसे हा तरुण जळगाव तालुक्यातील आसोदा येथे आपल्या कुटुंबियांसह वास्तव्यास होता. भूषण हा घरी असतांना शनिवारी दि. १८ नोव्हेंबर रोजी दुपारी अचानक त्याच्या छातीत दुखू लागले. कुटुंबिय त्याला रुग्णालयात घेऊन जात असताना भूषणला हृदयविकाराचा तीव्र झटका आला आणि रस्त्यातच त्याची प्राणज्योत मालवली. भूषणला शासकीय वैद्यकीय महाविद्यालय व रुग्णालयात दाखल केले असता डॉक्टरांनी मयत घोषित केले.
या प्रकरणी तालुका पोलिस ठाण्यात अकस्मात मृत्यूची नोंद करण्यात आली आहे. पुढील तपास पोहेकॉ रामकृष्ण इंगळे करीत आहेत. दरम्यान, एवढ्या कमी वयात त्याचा हृदयविकाराच्या झटक्याने मृत्यू झाल्याने सर्वत्र हळहळ व्यक्त केली जात होती. भूषणचा दुर्देवी मृत्यू झाल्याची माहिती मिळताच त्याच्या कुटुंबियांसह मित्रांनी जिल्हा रुग्णालयात मनहेलावणारा आक्रोश केला. मयत भूषणच्या पश्चात आई, वडील व विवाहित बहिण असा परिवार आहे
