धरणगाव (प्रतिनिधी) आज नोडल अधिकारी तथा विभागीय अधिकारी विनय गोसावी यांचा अध्यक्षतेखाली बैठक पार पडली. या बैठकीमध्ये शहरात मंगळवार दि. २३ मार्च २०२१ ते शनिवार २७ मार्च २०२१ असे एकूण ५ दिवस लॉकडाऊन ठेवण्याचा निर्णय सर्वानुमते घेण्यात आला. यामध्ये फक्त मेडिकल व दुध यांना सुट देण्यात आली आहे. तसेच पाच दिवसांच्या लॉकडाऊनचे कडेकोट बंदचे पालन करावे, असे आव्हान प्रांतधिकारी विनय गोसावी यांनी केले.
येथे नगरपरिषद हद्दीत दि. २३ मार्च ते २७ मार्च २०२१ या कालावधीमध्ये प्रतिबंधात्मक उपाययोजना कठोरपणे राबविता याव्यात यांकरिता उपविभागीय दंडाधिकारी एरंडोल विभाग यांच्यावतीने धरणगाव येथील बैठकीचा अहवाल जिल्हाधिकारी महोदय यांना विशेष अहवाल सादर करण्यात आला होता. त्याअनुषंगाने जिल्हा दंडाधिकारी यांनी धरणगाव नगरपरिषद हद्दीमध्ये फक्त शहरी भागांमध्ये दि. २३ मार्च ते २७ मार्च २०२१ या कालावधीमध्ये लॉकडाउन राबविण्यास मंजुरी दिलेली आहे. याबाबतचा आदेश थोड्याच वेळात निर्गमित होत आहे. धरणगाव नगरपालिका हद्दीतील सर्व सन्माननीय नागरिक लोकप्रतिनिधी पत्रकार बांधव व्यवसायिक परिसरातील शेतकरी बांधव यांनी याची नोंद घ्यावी.
आदेश हा दूध खरेदी विक्री केंद्र, खाजगी व शासकीय वैद्यकीय स्थापना, औषध केंद्रे, आपत्ती व्यवस्थापनाशी निगडित दुकाने उघडे राहतील तसेच धरणगाव शहरातील सर्व आठवडे बाजार बाजारपेठा, किराणा दुकान इतर सर्व दुकाने, किरकोळ भाजीपाला फळे खरेदी विक्री केंद्र, शैक्षणिक संस्था शाळा, महाविद्यालय, खाजगी कार्यलय बंद राहतील. तसेच हॉटेल रेस्टॉरंट सर्व बंद राहील, त्याचबरोबर शॉपिंग मॉल्स मार्केट सलून, दारूची दुकाने गार्डन, पार्क, बगीचे सिनेमागृहे नाट्यगृहे व्यायाम शाळा जलतरण तलाव, क्रीडा स्पर्धा प्रदर्शने मेळावे, पान टपरी हातगाड्या उघड्यावर खाद्य पदार्थ विक्रीचे दुकाने बंद राहतील. असे आव्हान प्रांतधिकारी विनय गोसावी यांनी केले.
यावेळी उपस्थित शिवसेना जिल्हा प्रमुख गुलाबराव वाघ, लोकनियुक्त नगराध्यक्ष निलेश चौधरी, पोलीस निरीक्षक जयपाल हिरे, डॉ. गिरीष चौधरी, न पा कर निरीक्षक प्रणव पाटील, व्यापारी असोसिएशनचे मंगलदास भाटीया संजय कोठारी, शिवसेना शहर प्रमुख राजेंद्र महाजन, भाजपा शहर अध्यक्ष दिलीप महाजन, कॉग्रेसचे विकास लाबोळे, चर्मकार समाजाचे अध्यक्ष भानुदास विसावे, भाजीपाला असोसिएशन भगवान महाजन, पत्रकार, प्रतिष्ठितनागरिक लहान मोठे व्यापारी, सर्वपक्षीय नगरसेवक पदाधिकारी उपस्थित होते.
