मुंबई (वृत्तसंस्था) शिवसेना पक्ष कोणाचा, पक्षाचे निवडणूक चिन्ह धनुष्यबाण कोणाचे, यावर ठाकरे गट (Shivs Sena Thackeray Gat) आणि शिंदे गटात (Shiv Sena Shinde Gat) वाद सुरू आहे. या वादावर निवडणूक आयोगासमोर (Election Commission) आज दोन्ही गटांनी आपापले म्हणणे लेखी स्वरुपात सादर केले.
ठाकरे गटाचे लेखी उत्तर काय?
आज लेखी युक्तिवाद सादर करण्याचा अखेरचा दिवस असून सायंकाळी 5 वाजेपर्यंत युक्तिवाद सादर करता येणार होता. अवघा एक मिनिट कमी असताना शिंदे गटाचे वकिलांनी आपले म्हणणे सादर केले. शिवसेना ठाकरे गटाने आज निवडणूक आयोगाला सादर केलेल्या लेखी युक्तिवादात एकनाथ शिंदे यांच्या बंडांची माहिती देण्यात आली आहे. निवडणूक आयोगाला 20 जून 2022 पासूनच्या घटनाक्रमांची माहिती देण्यात आली आहे. एकनाथ शिंदे यांच्याकडे असलेले मुख्य नेतेपद हे शिवसेनेच्या घटनाविरोधी असल्याचा युक्तिवाद ठाकरे गटाने केला आहे. शिंदे गटाने पक्षावर आणि पक्ष चिन्हावर केलेला दावा हा चुकीचा असल्याचेही ठाकरे गटाने म्हटले. पक्ष म्हणजे आमदार-खासदारांचा नसतो. तर पक्ष हा कार्यकर्ते आणि पदाधिकाऱ्यांचा असतो. आम्ही त्याचे पुरावे दिले आहेत. जवळपास तीन लाख पदाधिकारी आणि 20 लाख प्राथमिक सदस्यांचे प्रतिज्ञापत्र निवडणूक आयोगासमोर सादर करण्यात आली असल्याचे शिवसेना नेते अॅड. अनिल परब यांनी सांगितले.
शिंदे गटाचे लेखी उत्तर काय?
आज सायंकाळी पाचपर्यंत उत्तर सादर करण्याचे केंद्रीय निवडणूक आयोगाचे निर्देश होते. त्यानुसार, मुदतीला एक मिनिट शिल्लक असताना शिंदे गटाकडून निवडणूक आयोगात लेखी उत्तर सादर केले. त्यानुसार केंद्रीय निवडणूक आयोगात लेखी उत्तर सादर केले. त्यात मुळ पक्ष आम्हीच आहोत असा दावा करण्यात आला. एकनाथ शिंदेंची निवड लोकशाही पद्धतीने झाले. एकनाथ शिंदे यांचे पद घटनात्मक आहे. पक्ष लोकप्रतिनिधींचे संख्याबळ जास्त आहे. बहुमत, संख्याबळ विचारात घ्यावे. धनुष्यबाण चिन्हासाठी आम्ही पुराव्याची पुर्तता केली आहे. मुळ पक्ष आमचाच आहे. आम्हाला पक्षाचे धनुष्यबाण चिन्ह मिळावे.
