छत्रपती संभाजी नगर (वृत्तसंस्था) आईचे बोट धरून चॉकलेट आणण्यासाठी दुकानात जात असलेल्या चार वर्षीय मुलाला एका खासगी शाळेच्या बसने धडक दिली. यात त्याचा जागीच मृत्यू झाला तर आई जखमी झाल्याची हृदद्रावक घटना पैठण रस्त्यावरील चितेगाव- पांगरा रस्त्यावर बुधवारी (दि. १७) दुपारी चार वाजता घडली. हमजा शाहरूख शेख असे ठार झालेल्या चिमुकल्याचे नाव आहे. अपघातानंतर संतप्त जमावाने बस पेटवून दिले.
चॉकलेट घेण्यासाठी जात असताना अपघात !
हमजा शाहरुख शेख हा आईसोबत किराणा दुकानामध्ये चॉकलेट घेण्यासाठी जात असताना चितेगाव-पांगरा रस्ता ओलांडत असताना याचवेळी चितेगावहून शाळकरी मुलांना सोडून संभाजीनगरकडे जाणाऱ्या खासगी शाळेच्या बसने (एमएच१५ ए. के १४४६) हमजा आणि त्याच्या आईला धडक दिली. या अपघातात हमजाचा जागीच मृत्यू झाला तर आई किरकोळ जखमी झाली.
बसची तोडफोड करत पेटवली !
या हृदयद्रावक अपघातानंतर संतप्त गावकऱ्यांनी बसची तोडफोड केली. त्यानंतर वाहनाला पेटवून दिले. यामुळे परिसरातील वातावरण चांगलेच तणावग्रस्त झाले होते. लहान मुलाचा दुर्दैवी अंत झाल्याने परिसरात हळूहळू व्यक्त केली जात आहे. दरम्यान, घटनेची माहिती मिळताच बिडकीन पोलीस कर्मचाऱ्यांचे पथक घटनास्थळी दाखल झाले. याप्रकरणी बस चालकाविरुद्ध गुन्हा दाखल करण्यात आला आहे. तपास सपोनि गणेश सुरवसे करीत आहेत.
बस चालकाने घटनास्थळाहून काढला पळ !
इटखेडा येथील अग्रसेन विद्या मंदिर या शाळेची बस (एम. एच १५ एके १४४६) पांगरा येथील काही विद्यार्थ्यांना घरी सोडण्यासाठी गावात आली होती. दुपारी चार वाजेच्या सुमारास विद्यार्थ्यांना सोडून परत जाताना रस्त्यालगत आईसोबत चालत जाणारा हमजा शाहरुख शेख (वय ५ वर्षे) हा चिमुकला बसच्या पुढील चाकाखाली येऊन चिरडला गेला. त्यानंतर चालकाने बस पुढे काही अंतरावर नेऊन उभी केली व तेथून पळ काढला.
