मुंबई (वृत्तसंस्था) राष्ट्रवादी काँग्रेस अजित पवार गटाचे नेते आणि माजी आमदार बाबा सिद्दीकी यांच्यावर शनिवारी रात्री तीन अज्ञातांनी गोळीबार केल्याची घटना वांद्रे पूर्व येथे घडली. गोळीबारात बाबा सिद्दीकी हे गंभीर जखमी झाल्याने त्यांना तत्काळ लीलावती रुग्णालयात उपचारासाठी नेण्यात आले. मात्र या हल्ल्यात त्यांचा मृत्यू झाला. या प्रकरणात उपस्थित कार्यकर्त्यांनी तीन हल्लेखोरांपैकी दोघांना पकडले आणि पोलिसांच्या ताब्यात दिले आहे. त्यांच्याकडून पिस्तुल जप्त करण्यात आली आहेत. या दोन आरोपींची नावे उघड झाली असून हे दोघे बिश्नोई गँगचे असल्याचे सांगितले जात आहे.
हल्ल्याची माहिती मिळताच पोलिसांनी घटनास्थळी धाव घेत तपास सुरू करून दोन संशयितांना ताब्यात घेतले आहे. त्यातील एक उत्तर प्रदेश आणि दुसरा हरयाणाचा आहे. वांद्रे पूर्वेकडील खेरवाडी जंक्शन परिसरात बाबा सिद्दीकी यांचा मुलगा झिशान सिद्दीकी यांच्या कार्यालयाजवळ ही घटना घडली. तीन तरुणांनी बाबा सिद्दीकी यांच्यावर गोळीबार करून पळ काढला. या घटनेने परिसरात खळबळ उडाली आहे. गोळ्या लागून गंभीर जखमी झालेल्या बाबा सिद्दीकी यांना तातडीने उपचारांसाठी लीलावती रुग्णालयात नेण्यात आले. येथे त्यांच्यावर उपचार सुरू असताना डॉक्टरांनी मयत घोषित केले. बाबा सिद्दीकी यांच्यावर गोळीबार का आणि नेमका कोणी केला, याची माहिती अद्याप समोर आलेली नाही. गोळीबाराच्या घटनेची नोंद निर्मलनगर पोलीस ठाण्यात करण्यात आली असून गुन्हे शाखेच्या पथकाने तपास सुरू केला आहे. बाबा सिद्दीकींवर हल्ला करण्यापूर्वी तिन्ही आरोपी रिक्षाने घटनास्थळी पोहोचले होते. बाबा सिद्दीकी येण्याची ते वाट पाहत होते. आरोपी गेल्या २५-३० दिवसांपासून त्या भागाची रेकी करत होते. क्राईम ब्रांचला आरोपींनी ते बिश्नोई गँगचे असल्याचे सांगितले आहे.
बाबा सिद्दीकी गोळीबार प्रकरणात तिसऱ्या आरोपीची ओळख पोलिसांना पटल्याची सूत्रांची माहिती आहे. आरोपीनी बाबा सिद्धीकी यांचा हत्येपुर्वी बाबा सिद्धीकीवर पाळत ठेऊन हत्या केल्याचा पोलिसांना संशय आहे. बाबा सिद्दिकी हे झिशान सिद्दिकी यांच्या ऑफिसमधून बाहेर पडले. दोघेही घरी जाण्यासाठी निघाले होते. मात्र त्याचवेळी झिशानला एक कॉल आला आणि ते दोघेही कारमधून बाहेर पडले. बाबा सिद्दिकी हे कार्यकर्त्यांसोबत बोलत होते. त्याचवेळी अचानक एक स्फोट झाला. स्फोट झाल्यानंतर प्रचंड धूर झाला. लोकांना वाटले की हा फटक्याचा धूर होता. मात्र तो फटाक्याचा धूर नव्हता. स्फोट झाल्यानंतर लगेचच तीन राऊंड फायर करण्यात आले. त्यानंतर लोक गाडीच्या दिशेने पळाले. जीव वाचवण्यासाठी बाबा सिद्दिकी हे जीव वाचवण्यासाठी गाडीच्या दिशेने धावले. मात्र पुन्हा दोन राऊंड फायर करण्यात आले.
