जळगाव (प्रतिनिधी) बीएचआर घोटाळ्यातील संशयित आरोपी प्रमोद किसन कापसे याने अटकेच्या भीतीने मागील तीन दिवसात १५ ठेवीदारांचे ३४ लाख २३ हजार ५७७ रुपये घरपोच परत केले आहेत. त्यात जळगावचे ११ तर पुणे जिल्ह्यातील ४ ठेवीदारांचा समावेश आहे. कापसेने याआधी ६४ ठेवीदारांची एक कोटीहून अधिकची रक्कम परत केलेली आहे. दरम्यान, ठेवीदारांनी पुन्हा एकदा पुणे आर्थिक गुन्हे शाखेच्या उपायुक्त भाग्यश्री नवटके आणि त्यांच्या सहकाऱ्यांचे आभार मानले आहेत.
पुणे जिल्ह्यातील इंदापूर तालुक्यातील निमगाव-केतकी येथील संशयित आरोपी प्रमोद किसन कापसे याने शनिवारपासून जळगावमधील ११ तर पुणे जिल्ह्यातील ४ असे एकूण १५ ठेवीदारांचे तब्बल ३४ लाख २३ हजार ५७७ रुपये घरपोच परत केले आहेत. कापसे आता अजून अंदाजे १२ ठेवीदारांचे ६० टक्क्याप्रमाणे २६ लाख २३ हजार ६८० रुपये परत करणार आहे. ४० टक्के रक्कम देऊन ठेवीदारांकडून १०० टक्के पैसे मिळाल्याचे प्रतिज्ञापत्र करून घेतले होते. परंतू पुणे आर्थिक गुन्हे शाखेने निमगाव-केतकी येथील ठेवीदारांचे जबाब घेतले होते. त्यानुसार त्यांना फक्त ४० टक्के रक्कम मिळाली होती. त्यामुळे पोलिसांनी कापसेला अटक करण्याची तयारी सुरु केली होती. परंतू अटकेच्या भीतीने कापसेने ठेवीदारांचे पैसे परत करायला सुरुवात केली. त्यानुसार १ ते ७ जुलैच्या दरम्यान, त्याने ६४ ठेवीदारांची उर्वरित ६० टक्के रक्कम १ कोटी १२ लाख रुपये घरी जाऊन परत केले होते. दरम्यान, कापसेने मागील ३ दिवसात १५ ठेवीदारांचे पैसे परत केल्यानंतर त्याने पैसे परत केलेल्या ठेवीदारांची संख्या ८१ वर पोहोचली आहे. तर आतापर्यंत कापसेने एकूण १ कोटी ६१ लाख ४७ हजार ११४ रुपये ठेवीदारांचे परत केले आहेत.यातील बहुतांश ठेवीदारांनी पुणे आर्थिक शाखेच्या उपायुक्त भाग्यश्री नवटके मॅडमांचे आभार मानले आहेत. तसेच नवटके मॅडमांच्या कारवाईच्या भीतीमुळेच हे शक्य झाल्याची भावना देखील अनेकांनी व्यक्त केली. पैसे परत मिळायला जोरात सुरुवात झाल्यामुळे ठेवीदारांमध्ये आनंदाचे वातावरण आहे.
विजय वाघमारे (9284058683)
