जामनेर (प्रतिनिधी) भाईचंद हिराचंद रायसोनी पतसंस्था घोटाळ्याचे धागेदोरे जामनेरपर्यंत पोहचले आहेत. माजी मंत्री तथा भाजप आमदार गिरीश महाजन यांनी थेट लाभार्थी दिसू नये म्हणून कार्यकत्र्यांच्या नावावर मालमत्ता घेऊन आपल्या पत्नीच्या नावावर केल्याचा खळबळजनक आरोप माजी नगराध्यक्ष पारस ललवाणी यांनी आज केला आहे. धक्कादायक म्हणजे याबाबत त्यांनी पुणे आर्थीक गुन्हे शाखेला ढीगभर पुरावे दिल्याची माहिती दिली असल्याचेही पत्रकारांना सांगितले. एवढेच नव्हे नव्हे तर, ललवाणी यांनी पुराव्या दाखल काही गटनंबरही देऊन जनतेने ऑनलाईन उतारे तपासून पहावे, असे आवाहनही केले. आज ललवाणी हे जामनेर येथे त्यांच्या निवासस्थानी पत्रकारांसोबत बोलत होते.
आज ललवाणी हे जामनेर येथे दाखल झाले असता त्यांच्या निवासस्थानी झालेल्या पत्रकार परिषदेत माहिती देताना ते म्हणाले की बीएचआर पतसंस्थे संबंधी माझ्याकडे बरेच पुरावे आहेत .माजी मंत्री व त्यांच्या हस्तकांनी काय काय पराक्रम केले हे मला माहित आहे. ही सर्व माहिती मी पुणे येथील आर्थिक गुन्हे शाखेकडे दिली असून जामनेर शहरातील २० ते २५ कोटी रुपयांची जमीन फक्त एक ते सव्वा कोटी रुपयात आमदार महाजन यांनी घेतली. हे पैसे ही रोक न भरता पावत्या जमा केल्या. शहरातील त्यांच्या जवळच्या कार्यकर्त्यांच्या नावावर ही त्यांनी बीएचआरच्या अनेक जमिनी मातीमोल भावात विकत घेतले आहेत. भाईचंद हिराचंद रायसोनी पतसंस्था पतसंस्था डबघाईस येऊन अवसायनात गेली. त्यावेळी तत्कालीन मंत्री तथा आमदार गिरीशमहाजन यांनी अवसायक म्हणून मर्जीतील व्यक्त असलेल्या जितेंद्र कंडारेंची नियुक्ती करवून घेतली. एवढेच नव्हे तर संपुर्ण पाच वर्ष त्यांची बदली होऊ दिली नाही.
अवसायक कंडारे यांच्या माध्यमातून लिलावाचा देखावा करून सुनील झंवरसह काही मोजक्या कार्यकत्र्यांच्या नावे कवडीमोल दराने मालमत्ता घेतल्या. मालमत्तांच्या लिलावातून आलेली रक्कम ठेवीदारांना परत करणे अपेक्षीत असतांना रक्कम न भरता बहुतांशी ठेवीदारांच्या पावत्या कमीशनवर घेऊन त्यांचा भरणा केला. अशाप्रकारे ठेवीदारांची सोईस्कर पध्दतीने फसवणूक करण्यात आल्याचा आरोप ललवाणी यांनी आमदार महाजन यांच्यावर केला. यावेळी ललवाणी यांनी पुराव्यादाखल जामनेरातील गट क्रमांक २२६ व २२७ ही १८ कोटींची मालमत्ता बीएचआरकडून भंसाली नामक व्यक्तीच्या नावे केवळ तीन कोटीत घेऊन दोन महिण्यांपुर्वी स्वत:सह पत्नी साधना महाजन यांचे नावे पलटवून खळबळजनक आरोप केला. तसेच पुणे येथील ढोले रोडवरील १२५ कोटींची मालमत्ता सुनील झंवर यांचे नावे केवळ १४ कोटीत घेतली,असल्याचेही ते म्हणाले. त्यामुळे आ. महाजन यांच्यावरही ठेवीदार आत्महत्याप्रकरणी गुन्हा दाखल करावा, अशी मागणी ललवाणी यांनी केली.
ललवाणी पुढे म्हणाले की, पुणे गुन्हे शाखेतून मला बोलावणे आलेले नव्हते. मी स्वत:हून पुण्याच्या कार्यालयात गेलो होतो. माझ्याकडे आमदार महाजन यांच्या विरोधात असलेली सविस्तर माहिती ढिगभर पुराव्यानिशी आर्थीक गुन्हे शाखेला दिली. त्यामुळे तपासाअंती आमदार महाजन यांच्यावर निश्चीत गुन्हा दाखल होईल, असा विश्वासही ललवाणी यांनी पत्रकारांशी बोलतांना व्यक्त केला. आमदार महाजन धुतल्या तांदळासारखे आहेत तर ते आज रिंगण सोडून पळ का काढत आहेत?. त्यांचे अनेक कार्यकर्ते आज भूमिगत आहेत. जर त्यांनी अपहार केला नाही तर भूमिगत होण्याचे कारण काय असा प्रश्न उपस्थित करून ते शेवटी म्हणाले की या सर्व प्रकरणाची चौकशी करून त्यांच्यावर गुन्हे दाखल करण्यात यावे अशी मागणी त्यांनी केली. दरम्यान, पारस ललवाणी यांनी केलेले आरोप हे बिनबुडाचे असून आ. महाजनांवर आरोप करण्याची तुमची पात्रता आहे का? असा टोला भाजपाचे तालुका अध्यक्ष चंदकांत बाविस्कर यांनी ललवाणी यांना लगावला आहे.
