भुसावळ (प्रतिनिधी) – शहरालगत मिलिटरी स्टेशन कॅम्पसच्या मागे आणि झेटीआरआय बोगद्याजवळील कालिका माता मंदिराचे पुजारी संतोष रघुवीर मंचल (वय ५५) यांची अज्ञात हल्लेखोरांनी डोक्यात जड व टणक वस्तूने प्रहार करून निघृण हत्या केल्याची धक्कादायक घटना सोमवारी सकाळी उघडकीस आली. या घटनेमुळे भुसावळ शहरासह रेल्वे परिसरात खळबळ उडाली आहे.
या संदर्भात मिळालेल्या माहितीनुसार, संतोष मंचल हे गेल्या ६ ते ७ वर्षांपासून कालिका माता मंदिर परिसरातील पत्र्याच्या खोलीत वास्तव्यास होते. ते मंदिरातील तीन देवस्थानांची देखभाल, स्वच्छता आणि नियमित पूजा, अर्चना करत असत. दरम्यान, सोमवारी सकाळी सुमारे १० वाजता एक भाविक मंदिरात दर्शनासाठी आला असता, मंदिरालगतच्या पत्र्याच्या खोलीजवळ मंचल यांचा रक्ताच्या थारोळ्यात पडलेला मृतदेह त्यांना आढळला त्यानंतर तातडीने १०० क्रमांकावर संपर्क साधून ही माहिती पोलिसांना देण्यात आली. तर, घटनेची माहिती मिळताच जिल्हा पोलीस अधीक्षक श्रीकांत धिवरे, उपविभागीय पोलीस अधिकारी केदार बारबोले, स्थानिक गुन्हे शाखेचे पोलीस निरीक्षक राहुल गायकवाड, भुसावळ शहर पोलीस ठाण्याचे पोलीस निरीक्षक महेश गायकवाड यांनी घटनास्थळी भेट देऊन पाहणी केली पंचनामा करून मृतदेह शवविच्छेदनासाठी रुग्णालयात पाठवण्यात आला. दरम्यान, मयत मंचल यांच्या कुटुंबीयांनी संतोष मंचल यांना मद्याचे व्यसन असल्याचे आणि त्यावरून घरात वाद होत असल्याची माहिती पोलिसांना दिली आहे. मात्र, या हत्येचा त्याच्याशी संबंध आहे का, याबाबत अद्याप कोणतीही अधिकृत माहिती समोर आलेली नाही.
पोलिसांनी गोळा केले पुरावे
या हत्येमागील नेमके कारण अद्याप अस्पष्ट असून चोरी, जुने वैमनस्य, वैयक्तिक वाद किंवा इतर कोणत्या कारणातून हा प्रकार घडला, याचा पोलीस सर्व बाजूंनी तपास करत आहेत. जळगाव येथून ठसेतज्ज्ञ आणि फॉरेन्सिक पथकाला घटनास्थळी पाचारण करण्यात आले असून महत्त्वाचे पुरावे संकलित करण्यात आले आहेत. पोलिसांनी तपासचक्रे फिरवली आहेत.
