जळगाव (प्रतिनिधी) – मनपाकडून व्यापारी संकुलाच्या तिसऱ्या मजल्यावर बांधकामाची परवानगी मिळाल्याचे खोटे व बनावट कागदपत्रे तयार करुन सुरेश नंदलाल तलरेजा यांच्याकडून वेळोवेळी ३ कोटी ७२ लाख रुपये रक्कम उकळली. त्यानंतर संबंधित व्यवहाराची सौदापावती व पुरवणी करारनामा करुन ताब्यात असलेल्या मालमत्तेचे दुसरे खरेदीखत करुन त्यांची आर्थीक फसवणुक केल्याची घटना रविवार दि. ६ सप्टेंबर रोजी उघडकीस आली. याप्रकरणी के पी. इन्फ्रास्ट्रक्र, ममता अनिल साहित्या, अनिल खुबचंद साहित्या, खुबचंद प्रेमचंद साहित्या, नितीन खुबचंद साहित्या (सर्व रा. मोहाडी रोड), जयराम इन्फ्रास्ट्रक्र प्रोजेक्ट्स प्रा. लि. व विशाल रामगोपाल शर्मा (रा. मुंबई) यांच्याविरुद्ध शहर पोलिसात फसवणुकीचा गुन्हा दाखल करण्यात आला आहे.
शहरातील हॉटेल व इस्टेट ब्रोकर व्यावसायीक सुरेश तलरेजा यांची बांधकाम व्यावसायीकांसोबत ओळख आहे. त्यांनी शहरातील सीटी सर्वे नंबर २१२५/७ या ठिकाणी संत बाबा हरदासराम शॉपींग कॉम्पलेक्स नावाने व्यापारी संकुल बांधून तेथील दुकाने आणि ऑफिस विक्रीसाठ विक्रीसाठी आल्याची जाहीरात वृत्तपत्रामध्ये प्रसिद्ध केली होती. त्यानुसार खुबचंद साहित्या यांनी तलरेजा यांना सन २०२१ मध्ये या व्यापारी संकुलातील तिसऱ्या मजल्यावरील ऑफिसची जागा विकत घेण्याबाबत सांगितले होते. दरम्यान, तलरेजा यांना या व्यापारी संकुलाच्या तिसऱ्या
मजल्यावरील बांधकामाला परवानगी नसल्याचे समजल्यानंतर त्यांनी व्यवहार करण्यास नकार दिला होता.
वेळोवेळी दिलेल्या रक्कमेची स्वतःच्या अक्षराने केली नोंद
साहित्या कुटुंबियांनी दि. १५ डिसेंबर २०२१ रोजी तलरेजा यांना त्यांच्या हॉटेल के पी. प्राईडमधील कार्यालयात बोलावून घेतले. महापालिकेने तिसऱ्या मजल्यापर्यंत बांधकामाला परवानगी सांगून मनपाचे लेटरहेड, नगररचना अधिकाऱ्याची सही व शिक्का असलेली कागदपत्रे दाखविल्यानंतर त्यानंतर सुरेश तलरेजा यांनी वेळोवेळी त्यांच्या खात्यावर आरटीजीएसद्वारे व रोख स्वरुपात रक्कम दिली असून याबाबतच्या नोंदी खुबचंद साहित्या यांनी स्वतः च्या हस्ताक्षरात स्वाक्षरी करुन डायरीमध्ये केल्या आहे.
सात जणांविरुद्ध फसवणुकीचा गुन्हा दाखल
सुरेश तलरेजा यांनी दि. ६ सप्टेंबर रोजी शहर पोलिसात तक्रार दिली. त्यानुसार के पी. इन्फ्रास्ट्रक्कर, ममता अनिल साहित्या, अनिल खूबचंद साहित्या, खुबचंद प्रेमचंद साहित्या, नितीन खुबचंद साहित्या (सर्व रा. मोहाडी रोड), जयराम इन्फ्रास्ट्रक्र प्रोजेक्ट्स प्रा. लि. व विशाल रामगोपाल शर्मा (रा. मुंबई) यांच्याविरुद्ध शहर पोलिसात फसवणुकीचा गुन्हा दाखल करण्यात आला आहे.
ताब्यातील जागेबाबत तयार केले खरेदीखत
जुलै २०२६ मध्ये तलरेजा यांचा ताबा असलेल्या मिळकतीचा परस्पर व्यवहार झाल्याचे त्यांना समजले. त्यांनी महापालिकेत चौकशी केल्यानंतर त्यांना संबंधित व्यापारी संकुलाच्या दुसऱ्या मजल्यापर्यंतच बांधकामाला परवानगी दिली असल्याचे समजले. दरम्यान, ममता साहित्या, जयराम इन्फ्रास्ट्रक्चर प्रोजेक्ट्स प्रा. लि. व विशाल शर्मा यांच्या लाभात दि. १० जून २०२६ रोजी नोंदणी केलेल्या खरेदीखतामध्ये तलरेजा यांच्या ताब्यातील जागेबाबत ओपन टेरेस असल्याचे दर्शवून खरेदीखत केल्याचे त्यांच्या निदर्शनास आले.
तगादा लावल्यानंतर लेखी स्वरुपात दिला ताबा
ऑफिसच्या जागेबाबत ममता साहित्या यांनी दि. २८ मार्च २०२३ रोजी तलरेजा यांना सौदापावती करुन दिल्यानंतर त्यांच्या बँक खात्यावर १ कोटी रुपये आरटीजीएद्वारे वर्ग केले. त्यानंतर संशयितांनी दिलेल्या मुदतीमध्ये बांधकाम पुर्ण न करुन दिल्याने दि. ४ मे २०२४ रोजी पुरवणी सौदापावती करारनामा करुन दिला. त्यावेळी सुद्धा वेळावेळी तलरेजा यांनी ३ कोटी ७२ लाख रुपये आरटीजीएसद्वारे पैसे ट्रान्सफर केले आहे. खरेदीसाठी सुरेश तलरेजा यांनी तगादा लावल्यानंतर दि. ११ जून २०२४ रोजी ममता साहित्यांनी लेखी ताबा पावती करुन देत प्रत्यक्ष ताबा दिला. दरम्यान, याठिकाणी तलरेजा यांनी इस्टेट ब्रोकरचे कार्यालय व रिडींग रुम सुरु केली.
