जामनेर (प्रतिनिधी) तालुक्यातील शेंदुर्णी येथील सटाणा चौफुलीजवळ खाटीक व्यावसायिक बकरी ईदनिमित्त बकऱ्या घेऊन कल्याणकडे जात असताना लुटीच्या उद्देशाने आलेल्या तीन जणांनी गोळीबार केल्याची घटना गुरुवारी घडली होती. या गोळीबारामध्ये जळगावातील व्यावसायिकाचा शनिवारी उपचारादरम्यान मृत्यू झाला आहे.
याबाबत वृत्त असे की, जळगाव व शेंदुर्णी येथील चौघे खाटीक व्यावसायिक बकरी ईदनिमित्त बकऱ्या विक्रीसाठी पिकअप वाहनाने कल्याणकडे जात होते. दि. ८ रोजी पहाटे ३ वाजेच्या सुमारास त्यांचे वाहन मालेगाव शहराजवळ येताच सटाणा रोडवर दुचाकीवरून तिघांनी त्यांचा पाठलाग केला. दुचाकीस्वारांनी पिस्तूलचा धाक दाखवून वाहन थांबवण्यास सांगितले. मात्र, त्यांनी वाहन न थांबवल्याने सटाणा चौफुलीजवळ संशयितांपैकी एकाने वाहनावर गोळीबार केला. गोळी क्लीनरच्या बाजूस बसलेल्या जावेद खाटीक यांच्या डोक्याला लागल्याने ते गंभीर जखमी झाले. घटनेनंतर चालकाने मनमाड चौफुली भागात थांबून घडलेल्या प्रकाराची माहिती पोलिसांना कळवली. जखमी जावेदला धुळे येथे ओम हॉस्पिटलमध्ये उपचारासाठी हलवण्यात आले होते. दि. ९ रोजी मध्यरात्रीच्या सुमारास जावेद यांचे निधन झाले. शनिवारी रात्री त्यांचे पार्थिव जळगावातील कुंभारवाडा परिसरातील घरी आणण्यात येणार असून त्यानंतर अंत्यसंस्कार करण्यात येणार आहे.
दरम्यान, या घटनेनंतर संशयित फरार झाले असून त्यांचा शोध पोलीस घेत आहेत. परिसरातील हॉटेल्स व इतर दुकानांच्या सीसीटीव्ही फुटेजची तपासणी सुरू आहे.
