धरणगाव (प्रतिनिधी) आगामी निवडणुकीत मतदानाचा टक्का वाढवणे व राष्ट्रीय कार्यक्रमाचा (आरोग्य) मासिक आढावा नुकताच तहसीलदार महेंद्र सूर्यवंशी यांनी घेतलेल्या एका सभेत घेतला.
जिल्हाधिकारी तसेच मुख्य कार्यकारी अधिकारी यांच्यासह जिल्हा आरोग्य अधिकारी यांच्या मार्गदर्शनानुसार आगामी लोकसभा निवडणुकीच्या अनुषंगाने ३० रोजी घेण्यात आलेल्या सभेत कामकाजाचा आढावा घेण्यात आला. या संदर्भात तहसीलदार महेंद्र सूर्यवंशी यांच्या अध्यक्षतेखाली व तालुका आरोग्य अधिकारी डॉ. संजय चव्हाण यांच्या मार्गदर्शनाखाली ही सभा घेण्यात आली. या वेळी बाल विकास प्रकल्प अधिकारी श्रीमती तायडे, नगरपालिकेचे कर निरीक्षक प्रणव पाटील, वैद्यकीय अधिकारी डॉ. छाया तांदळे, डॉ. विनय चौधरी, डॉ. चैताली शहा, अरुण वारूळे तालुका आरोग्य सहाय्यक व सर्व समूदाय आरोग्य अधिकारी, सर्व आरोग्य कर्मचारी, गटप्रवर्तक व अंगणवाडीच्या मुख्य सेविका हजर होत्या.
या वेळी आगामी लोकसभा निवडणुकीसाठी आरोग्य संदर्भात असलेल्या सर्व प्रकारच्या सूचना देण्यात आल्या. तसेच इतर राष्ट्रीय कामाचा आढावा घेण्यात आला. तसेच आशा स्वयंसेवकांनी गरोदर माता, स्तनदा माता, दिव्यांग, ज्येष्ठ नागरिकांचे सकाळी लवकर १०० टक्के मतदान करुन घेण्यासाठी प्रोत्साहित करुन त्यांना मदत करावी. तसेच सर्व मतदान केंद्रावर बाल संगोपन केंद्र व आरोग्य केंद्र उपलब्ध करून देण्याबाबत विस्तृत मार्गदर्शन करण्यात आले. तर प्राथमिक आरोग्य केंद्र व तालुका आरोग्य अधिकारी कार्यालयात कंट्रोल रूम स्थापन करण्याबाबत या वेळी नियोजन करण्यात आले. तसेच मतदानाची टक्केवारी वाढवण्यासाठी प्रयत्न करण्याच्या सूचना देऊन नियोजन करण्यात आले.