जळगाव (प्रतिनिधी) तरुणाच्या नावे बनावट फेसबुक अकाऊंट तयार करून तरूणाच्या मित्रांसह नातेवाईकांना खरे भासवून त्यांच्याकडून पैशांची मागणी केल्याप्रकरणी अज्ञात व्यक्ती विरुद्ध गुन्हा दाखल करण्यात आला आहे.
याबाबत सविस्तर वृत्त असे की, निलेश तुकाराम पाटील रा. गणेश कॉलनी, भुसावळ जि. जळगाव हे खासगी नोकरी करून आपल्या कुटुंबियाचा उदरनिर्वाह करतात. १८ ते १९ मे दरम्यान निलेश पाटील यांच्या नावे अज्ञात व्यक्तीने बनावट फेसबुक अकाऊंट तयार केले. त्यावर निलेश पाटील यांचा फोटो लावून आकाऊंट सुरू करून त्यांच्या नावे तयार केलेले बनावट अकाऊंटवरून निलेश पाटील यांच्या मित्रांसह नातेवाईकांना खरे भासवून त्यांच्याकडून पैश्यांची मागणी केल्याचे समोर आलं. ही रक्कम फोन-पे किवा पेटीएमच्या माध्यमातून मागत असल्याचे दिसून आले. आपल्या नावे बनावट खाते तयार करून इतरांची फसवणूक होत असल्याची माहिती निलेश पाटील यांना समजली. त्यांनी तत्काळ जळगाव येथील सायबर पोलीस ठाण्यात रितसर अज्ञात व्यक्तीविरोधात तक्रार दिली. निलेश पाटील यांच्या तक्रारीवरून अज्ञात व्यक्तीविरूध्द सायबर पोलीस ठाण्यात गुन्हा दाखल करण्यात आला आहे. याप्रकरणी पुढील तपास पोनि बळीराम हिरे करीत आहे.
