चंद्रपूर (वृत्तसंस्था) राज्याचे माजी पर्यावरण आणि सांस्कृतिक मंत्री संजय देवतळे यांचं निधन झालं आहे. कुटुंबातील सदस्य कोरोनाबाधित निघाल्यावर देवतळे यांनी चाचणी केली होती. त्यावेळी त्यांनाही कोरोनाची लागण झाल्याचं समोर आलं होतं. यानंतर त्यांच्यावर गेले 6 दिवस नागपूरात खाजगी रुग्णालयात उपचार सुरू होते. कोरोनातून त्यांची तब्येत बऱ्यापैकी सावरली होती मात्र उपचारादरम्यान हृदयविकाराचा झटका आल्याने त्यांचे निधन झाले.
संजय देवताळे यांच्या अकाली निधनामुळे सर्व स्तरातून दु:ख व्यक्त होत आहे. ते ४ वेळा काँग्रेसच्या तिकिटावर वरोरा विधानसभा मतदारसंघातून आमदार म्हणून निवडून आले होते. जिल्ह्याच्या पालकमंत्रिपदासह राज्याच्या पर्यावरण मंत्रिपदाचा कारभारासुद्धा त्यांनी सांभाळला होता. त्यानंतर त्यांनी २०१४ च्या निवडणुकीमध्ये काँग्रेसला सोडचिठ्ठी देत भाजपात प्रवेश केला होता. यावेळी मात्र, त्यांचा पराभव झाला होता. त्यानंतर २०१९च्या निवडणूक त्यांनी शिवसेनेच्या तिकिटावर लढवली होती. पुन्हा शिवसेनेच्या सदस्यत्वाचा राजीनामा देत देवतळे यांनी केंद्रीय मंत्री नितीन गडकरी यांच्या उपस्थितीत भाजपत नुकताच प्रवेश केला होता.
