जळगाव ( प्रतिनिधी ) – शहरातील विमानतळ परिसरातील तारा बिझनेस पार्कमध्ये एका व्यावसायिकाच्या बंद घराचे कुलूप तोडून अज्ञात चोरट्यांनी १० लाख रुपयांच्या रोकडसह सुमारे १२ लाख १३ हजार रुपयांचे सोन्या-चांदीचे दागिने लंपास केल्याची खळबळजनक घटना उघडकीस आली आहे. याप्रकरणी एमआयडीसी पोलीस ठाण्यात अज्ञात चोरट्यांविरुद्ध गुन्हा दाखल करण्यात आला आहे.
कुसुंबा खुर्द (विमानतळ जवळ) भागातील तारा बिझनेस पार्कमध्ये मोईज अब्बास बोहरा (वय ४८) हे आपल्या कुटुंबासह राहतात. त्यांच्या घराच्या तळमजल्यावर ‘रुबी पेंट’ नावाची रंगाची फॅक्टरी असून वरच्या मजल्यावर ते वास्तव्यास आहेत. गेल्या दोन महिन्यांपासून त्यांच्या घरात रंगाचे आणि फर्निचरचे काम सुरू आहे. १० एप्रिल रोजी मोईज बोहरा हे एकटेच दर्शनासाठी बऱ्हाणपूर येथील हकीमी दर्गा येथे गेले होते. त्यानंतर १३ एप्रिल रोजी त्यांनी आपल्या कुटुंबालाही तेथे बोलावून घेतले. दुपारी दीड वाजेच्या सुमारास संपूर्ण कुटुंब घराला कुलूप लावून खासगी वाहनाने बऱ्हाणपूरकडे रवाना झाले.
परतल्यावर धक्काच बसला
१५ एप्रिल रोजी पहाटे २:१५ वाजेच्या सुमारास बोहरा कुटुंब घरी परतले असता, घराच्या वरच्या मजल्याचा दरवाजा अर्धवट उघडा दिसला. दरवाजाचे कुलूप तुटलेले पाहून कुटुंबाला चोरीचा संशय आला. घरात प्रवेश केला असता, हॉलमधील तीन गोदरेज कपाटांचे लॉक तोडून चोरट्यांनी सामान अस्ताव्यस्त फेकलेले दिसले. त्यांनी घरात पाहणी केली असता, चोरट्यांनी कपाटातील लॉकरमधून १० लाख १२ हजार रुपयांची रोकड, १० ग्रॅमचे सोन्याचे ब्रासलेट, २१ ग्रॅमच्या ५ अंगठ्या, २८ ग्रॅमच्या सोन्या-चांदीच्या बांगड्या असा एकूण १२ लाख १३ हजार रुपयांचा मुद्देमाल चोरट्यांनी लंपास केला.
पाळत ठेवून डाव साधला ?
घटनेची माहिती मिळताच पोलिसांनी घटनास्थळी धाव घेऊन पंचनामा केला. घरात फर्निचरचे काम सुरू असल्याने आणि फॅक्टरीत अनेक मजूर कामाला असल्याने, ओळखीच्या व्यक्तीने पाळत ठेवून हे कृत्य केले असावे का..?, या दिशेनेही पोलीस तपास करत आहेत. याप्रकरणी मोईज बोहरा यांच्या फिर्यादीवरून अज्ञात चोरट्यांविरुद्ध गुन्हा नोंदवण्यात आला असून पुढील तपास पोलीस उपनिरीक्षक राहुल तायडे हे करत आहेत.
