पाळधी ता. धरणगाव (प्रतिनिधी) दि. ९ मार्च, २०२१ मंगळवार रोजी जि. प. केंद्रशाळा पाळधी बु॥ व पाळधी केंद्र यांच्या संयुक्त विद्यमाने जागतिक महिला दिवस व सावित्रीबाई फुले स्मृतीदिवस या दोघं दिवसाच्या औचित्य साधुन राष्ट्रमाता व महामातांना अभिवादन करण्यात आले.
कार्यक्रमाचे प्रास्ताविक पाळधी केंद्राचे केंद्रप्रमुख प्रमोद सोनवणे यांनी केले. कार्यक्रमाच्या अध्यक्षस्थानी धरणगाव चे सभापती मा. मुकुंदरावजी नन्नवरे साहेब होते. प्रमुख अतिथी पंचायत समितीचे गटशिक्षणाधिकारी अशोकजी बिऱ्हाडे साहेब, मुख्याध्यापिका सुलोचना बाविस्कर, प्रमुख व्याख्याते महात्मा फुले हायस्कूलचे आदर्श शिक्षक पी.डी. पाटील होते. कार्यक्रमाचे अध्यक्ष व प्रमुख अतिथी मान्यवरांच्या हस्ते राष्ट्रमाता माँसाहेब जिजाऊ व शिक्षणतज्ञ – ज्ञानज्योती – आद्य कवयित्री सावित्रीमाई फुले यांच्या प्रतिमेचे पूजन करण्यात आले. जि.प. केंद्र शाळा पाळधीच्या वतीने कार्यक्रमाचे अध्यक्ष, प्रमुख अतिथी, व्याख्याते यांचे पुष्पगुच्छ देऊन स्वागत करण्यात आले. पंचायत समितीचे गटशिक्षणाधिकारी अशोक बिऱ्हाडे यांनी राष्ट्रमाता व महामाता यांच्या जीवन कार्याविषयी माहिती सांगितली व उपस्थित सर्व महिला शिक्षीकांना आंतरराष्ट्रीय महिला दिनाच्या शुभेच्छा दिल्या.
या कार्यक्रमाचे प्रमुख व्याख्याते महात्मा फुले हायस्कूलचे उपशिक्षक पी. डी. पाटील यांनी राष्ट्रमाता माँसाहेब जिजाऊ, राजमाता अहिल्यामाई होळकर, ज्ञानज्योती- स्त्री शिक्षणाच्या आद्य जनक – सावित्रीमाई फुले, त्यागमूर्ती रमाई भिमराव आंबेडकर यांच्या जीवन संघर्षावर प्रकाश टाकून भारतातील विविध क्षेत्रात सामाजिक, राजकीय, शैक्षणिक, क्रिडा क्षेत्रात काम करणार्‍या महिलांचे उदाहरण देऊन त्यांचे कार्य विशद केले. भारतातील थोर समाजसेविका – प्रथम मुख्याध्यापिका, शिक्षिका – आद्य कवयित्री – विचारवंत – स्त्री शिक्षणाच्या आद्य जनक – सावित्रीमाई फुले यांचे शैक्षणिक सामाजिक कार्य सांगितले.
कार्यक्रमाचे अध्यक्ष सभापती मुकुंदराव नन्नवरे यांनी महामातांना विनम्र अभिवादन करून सर्व उपस्थित महिला शिक्षकांना जागतिक महिला दिनानिमित्त शुभेच्छा दिल्या व अनमोल मार्गदर्शन केले. कोरोना काळात सर्वांनी स्वतःला सांभाळा व महामातांच्या विचारांवर चालण्याचा मोलाचा संदेश त्यांनी दिला.
कार्यक्रमाचे सूत्रसंचालन पाळधी केंद्राचे केंद्रप्रमुख प्रमोद सोनवणे व आभार शिक्षक सेनेचे जिल्हा सरचिटणीस नाना पाटील यांनी मानले. कार्यक्रम यशस्वीतेसाठी जि.प.केंद्रशाळा पाळधी बु॥ येथील मुख्याध्यापिका सुलोचना बाविस्कर, संजय गायकवाड, मनिषा शिरसाठ व उपस्थित सर्व शिक्षक बंधू – भगिनी यांनी अनमोल सहकार्य केले.
